Atyraý oblysynyń ákimi túlekterge «Abaıdyń qara sózderi» týyndysyn tartý etti

ATYRAÝ. QazAqparat –Atyraý oblysynyń ákimi Mahambet Dosmuhambetov mektep bitirgen túlekterdiń bir tobymen kezdesip, olarǵa «Abaıdyń qara sózderi» kitabyn tartý etti, dep habarlaıdy QazAqparat.

Kezdesýge Atyraý qalasynda, aýdandar men aýyldarda turatyn 20-dan astam túlek qatysty. Olardyń keıbiri kezdesýge onlaın rejımde qosyldy. Túlekterdiń kópshiligi –áleýmettik jaǵynan az qamtylǵan, sonymen qatar, kóp balaly otbasynan shyqqan, jetim nemese jartylaı jetim túlekter. Barlyǵy da ár salada jetistikke jetip, oblystyq, respýblıkalyq, sondaı-aq, halyqaralyq olımpıadalar men túrli baıqaýlarda júldeli orynnan kóringen jas daryndar.

Oblys ákimi Mahambet Dosmuhambetov túlektermen emen-jarqyn áńgimelesip, arman-maqsattaryn, usynys-pikirlerin tyńdady. Mamandyq tańdaý men joǵary bilim alýdyń mańyzyna qatysty aqyl-keńesin berdi. Túlekter aldaǵy UBT-ǵa daıyndyǵy, tańdaǵan mamandyqtary týraly áńgimelep, qazirgi qoǵamdaǵy máselelerge oraı pikirlerin bildirdi.

Atyraý qalasynda ornalasqan Á.Jangeldın atyndaǵy orta mektebiniń túlegi Eldar Qurmashev –mobıldi qosymsha jasap, «Jas óner tapqysh» atanǵan daryndy jas. Endi ol bolashaǵyn aqparattyq tehnologııamen baılanystyrǵysy keledi.

«Qazir álemde IT salasy qarqyndy damýda. Birde-bir salany osy tehnologııasyz elestetý múmkin emes. Jahandyq pandemııa tsıfrlandyrýdyń mańyzyn taǵy da dáleldep berdi. Elimizde atalǵan salaǵa aıryqsha kóńil bólinip otyr. Sondyqtan, qazirden bastap jańa tehnologııany meńgerýdiń mańyzyn eskerý kerek. Búgin mobıldi qosymsha jasasań, erteń IT salasynda adamzattyń ıgiligine aınalatyn jahandyq deńgeıdegi jańalyq asharyńa senemin. Armanyńa jet, Eldar», -dedi oblys ákimi Mahambet Dosmuhambetov.

Ákim mektep bitirýshi túlekterge aq jol tilep, olardyń ustazdaryna alǵysyn bildirdi. Kezdesýdi Atyraý qalasynyń Amangeldi atyndaǵy orta mektebiniń túlegi Aıbek Kárimov Abaıdyń «Kózimniń qarasy» ánimen túıindedi.

Júzdesýge qatysqan túlekter men bilimdi shákirtter tárbıelep, kásibı baǵyttaǵy jetistikterimen tanylǵan pedagogtarǵa «Abaıdyń qara sózderi» kitaby tabys etildi. Al, sharaǵa onlaın rejımde qatysqan túlekterge bul syılyq jetkizilip beriledi.

Eske sala ketelik, buǵan deıin atyraýlyq oqýshy whatsapp messendjeriniń balamasyn jasap shyǵarǵanyn jazǵan edik.