Atyraý oblysynyń ákimi Teńiz kenishinde shuǵyl jıyn ótkizdi
ATYRAÝ, QazAqparat - Atyraý oblysynyń ákimi Mahambet Dosmuhambetov keshe Teńiz kenishine baryp, ondaǵy ahýalmen tanysqan soń shuǵyl jıyn ótkizdi, dep habarlaıdy QazAqparat óńirlik kommýnıkatsııalar qyzmetine silteme jasap.
«Atyraý oblysynda jaǵdaı turaqtanǵanymen, Teńiz kenishindegi ahýal áli de alańdatady»,- dep málimdedi Mahambet Dosmuhambetov. Sonymen qatar, Teńiz kenishindegi jaǵdaıdy retteý máselesi talǵylanǵan májiliste, «qazirgi kezde «Teńiz» kenishinde ornalasqan 25 jataqhanada turatyn 42 mekemeniń 709 jumysshysynan COVID-19 ınfektsııasy anyqtaldy. 20 mamyrdaǵy málimet boıynsha, 615 naýqastyń 594-i aýrýhanaǵa jatqyzylǵan. Jaǵdaı áli de kúrdeli«, - dep atap ótti aımaq basshysy.
Jıyn barysynda oblys ákimdigi tarapynan qurylǵan arnaıy shtabtyń atqarýshy basshysy Aslan Bekjanov, Jylyoı aýdandyq bas sanıtarlyq dárigeri Talǵat Habıbýllın, Densaýlyq saqtaý mınıstrligi komıtet tóraǵasynyń orynbasary Nurhan Sádýaqasov, «Teńizshevroıl» JShS óndiris operatsııalary boıynsha menedjeri Garrı Enk qalyptasqan jaǵdaı týraly baıandama jasady.
Jıyndy qorytyndylǵan Mahambet Dosmuhambetov Teńiz qalashyǵyndaǵy oblystyq shtab fılıaly men «Teńizshevroıl» kompanııasyna birqatar naqty tapsyrmalar berdi. Atap aıtqanda, karantınge jabylǵan vahtalyq qalashyqtarǵa qatań baqylaý jasaý, sanıtarlyq-dezınfektsııalyq rejımdi baqylaý, túsindirme jumystaryn barynsha arttyrý, provızorlyq statsıonardy medıtsınalyq mamandarmen qamtamasyz etýdi jedeldetýdi eskertti. Sondaı-aq «Teńizshevroıl» kompanııasyna merdiger mekemelermen birlese otyryp jumys merzimi bitken qyzmetkerlerdi Teńiz kenishinen kelisilgen talaptardy qatań saqtaı otyryp shyǵarý josparlaryn ázirleýdi júktedi.
Teńiz kenishinde 18 naýryzdan bastap aýdan ákimshiligi janynan qurylǵan shtab, sondaı-aq 20 sáýirden bastap oblystyq shtabtyń fılıaly jumys isteýde. Budan ózge, kúni keshe quramyna Atyraý oblysy ákiminiń eki birdeı orynbasary, birqatar oblystyq departamentter men quqyq qorǵaý organdarynyń basshylary, TShO basshylyǵy jáne oblystyń Bas dárigeri men Densaýlyq saqtaý mınıstrligi Taýarlar men qyzmetterdiń sapasy men qaýipsizdigin baqylaý komıteti tóraǵasynyń orynbasary kiretin arnaıy jumys toby Teńiz kenishine baryp, jumys istep jatyr.
