Atyraý oblysynyń ákimi óńir jurtshylyǵyna Jańa jyl jasampazdyq jyly bolsyn, degen tilek aıtty

«Ardaqty atyraýlyqtar!

Kóne kúntizbe keter, jańa jyljazba jeter - toǵyspaly tusta turmyz!

Ótkenge - salaýat, kelerge - amanat!
Aıshyqty Atyraýymyz taǵy bir jylǵa kórkeıdi, taǵy bir jylǵa eseıdi!

Ońaı jyl boldy dep aıta almaımyn. Ǵalamdyq geosaıası turaqsyzdyq shıkizat naryǵyna tusaý saldy. Syrtqy syn-qater aımaǵymyzdy aınalyp ótpedi. Ýaqyttyń synyna zamannyń ózinen jaýap tapqan Elbasymyz Nursultan Ábishuly Nazarbaev kúngeıge alyp shyǵar Instıtýtsıonaldy bes reforma - Júz naqty qadam Ult josparyn usyndy.

Enshisi bólek bolǵanymen, kindigi bir álem jurtshylyǵyna Ulttar uıymynyń minberinen jahandy jasar jol kórsetti. Ana tilimiz tórtkúl dúnıeniń tórine shyqty.

Beıbit zaman suraýyn termen ótegen búgingi urpaq qıly kezeń zaýalyn qanmen ótegen baba urpaq rýxyna taǵzym etti.
Ata zańymyz asqaqtady!

Qoı jyly - shildexana toı jyly boldy. 16 myń sábı dúnıege kelip, besik jyry shańyraqtardy shattyqqa bóledi.

Yrysymyz artpasa, kemigen joq! Nesibemiz kóbeımese, azaıǵan joq!

"Altyn-kúmis tas eken, arpa-bıdaı as eken" dep Elbasymyzdyń ózi aıtqandaı, aýyl sharýashylyǵyna salǵan kúshimizdiń beker emes ekenin ýaqyt dáleldep otyr. Dastarxanymyz berekeli bolsa, kúnderimiz de merekeli bolmaq.

Ótken kúnge - ókpe joq, keler kúnnen - úmit kóp!

Qadirli jerlester!

Jańa jyl - jasampazdyq jyly bolsyn! Tilek-nıetterińiz qabyl bolǵaı!

Denderińizge saýlyq, otbasylaryńyzǵa amandyq tileımin!

Jańa jyly qutty bolsyn, aǵaıyn!», - delingen Baqtyqoja #zmuhambetovtiń Jańajyldyq quttyqtaýynda.