Atyraý oblysynyń ákimi Mahambet Dosmuhambetov vaktsına saldyrdy
ATYRAÝ. QazAqparat – Atyraý oblysynyń ákimi Mahambet Dosmuhambetov vaktsına saldyrdy, dep habarlaıdy QazAqparat.
Oblys ákimi koronavırýsqa qarsy vaktsına saldyrý úshin «Geolog» eldi mekenindegi emhanaǵa bardy.
«Dárigerler aldymen tirkeýden ótkizip, dene qyzýym men qan qysymymdy ólsheýden bastap, tolyq medıtsınalyq tekserý jasady. Odan keıin ǵana Qaraǵandy farmatsevtıka zaýytynda shyǵarylǵan «Spýtnık-V» vaktsınasyn saldyrttym. Vaktsınadan keıin jarty saǵat arnaıy bólmede mamandar baqylaýynda boldym. Qazir jaǵdaıym jaqsy, eshqandaı janama áserleri baıqalǵan joq. Mamandar ekpe salynǵan jerge sý tıgizbeı, jyly ustap, kútinip ári saqtyq sharalaryn ustanyp júrýge keńes berdi» deıdi Mahambet Dosmuhambetov.
Ákimniń aıtýynsha, jeksenbige qaramastan, emhanaǵa vaktsına alýshylar kelgen.
Al, dárigerler turǵyndardyń vaktsına alýǵa degen belsendiligi joǵary ekenin aıtyp otyr.
«Jaqyndarymyz ben aınalamyzdaǵylardy qorǵaý da, ózderińizdiń qorǵanýlaryńyz úshin de – koronavırýsqa qarsy vaktsına alý óte mańyzdy» deıdi oblys ákimi.
Eske sala ketelik, budan buryn Atyraý oblysynda 250 adam vaktsına alatynyn habarlaǵan edik.
