Atyraý oblysynyń ákimi qoımadaǵy dári-dármek qoryn tekserdi
ATYRAÝ. QazAqparat – Búgin aımaq basshysy Mahambet Dosmuhambetov dári-dármekter men medıtsınalyq maqsattaǵy buıymdardy turaqtandyrý qorynyń qoımasyn qarap shyqty, dep habarlaıdy Atyraý oblystyq kommýnıkatsııalar qyzmeti.
Atyraý oblysy ákimdigi dári-dármekter men medıtsınalyq zattardyń qoryn qurǵan bolatyn. Osy maqsatta «Atyraý» ÁKK Atyraý oblysyndaǵy eń iri dıstrıbıýtor kompanııamen arnaıy memorandým jasap, jyl sońyna deıin 4 mıllıon 800 myń orama dárilik zat pen medıtsınalyq buıym satyp alýǵa 500 mıllıon teńge bóldi. Bul somaǵa qosymsha 900 myń dana medıtsınalyq maqsattaǵy buıymdar men dári-dármekterdiń azaımaıtyn qory qurylady. Satyp alynǵan medıtsınalyq dári-dármekterdiń jalpy kóleminen 73,3 mln. teńgege 105 myń 235 dana dári-dármek qala jáne aýdandardaǵy dárihana jelilerine taratyldy.
Oblys ákimi budan bylaı dári-dármekter men basqa da medıtsınalyq maqsattaǵy buıymdardy jetkizý turaqty negizde júzege asyrylatyndyǵyn atap ótti.
« Bizdiń basty mindetimiz - azamattardyń densaýlyǵyn saqtaý. Qajetti dári-dármektermen qamtamasyz etý máselesin túbegeıli sheshý, dári-dármekterdiń mol qoryn qurý» - dedi Mahambet Dosmuhambetov.
Atap óterligi, Atyraý oblysynyń dárihanalaryna sońǵy úsh aptada 100 tonna dári-dármek jetkizildi. Jýyrda 40 tonna asa qajetti preparattar taǵy keledi.
