Atyraý oblysynyń ákimi Frantsııa elshisimen kezdesti
ATYRAÝ. QazAqparat - Atyraý oblysynyń ákimi Nurlan Noǵaev Frantsııanyń Qazaqstandaǵy Tótenshe jáne Ókiletti elshisi Fılıpp Martıne bastaǵan frantsýz delegatsııasymen kezdesti, dep habarlaıdy QazAqparat tilshisi.
Kezdesý barysynda óńir basshysy Elshini Frantsııa quramasynyń Reseıdegi fýtboldan álem chempıonatyndaǵy jeńisimen quttyqtady.
Nurlan Noǵaev atap ótkendeı, búgingi kúni Atyraý oblysy Memleket basshysy qoıǵan strategııalyq mindetterdi iske asyrýdaǵy belsendi jáne júıeli is-qımyldardyń nátıjesinde serpindi damý ústindegi óńirlerdiń biri. Oblysta údemeli ındýstrııalyq-ınnovatsııalyq damý aıasynda iri aýqymdy ınvestıtsııalyq jobalar iske asyrylýda. Qazirgi tańda óńir ekonomıkany ártaraptandyrý maqsatynda basqa baǵyttardy agroónerkásiptik keshendi, densaýlyq saqtaý, týrızm salalaryn damytýda.
«Memleket basshysy Nursultan Nazarbaevtyń elimizge sheteldik ınvestıtsııalardy, joǵary tehnologııalardy tartý, personaldardy álemdik standarttar boıynsha oqytý jónindegi tapsyrma berdi. Osy baǵytta oblysymyzda birqatar jumystar atqarylýda. Biz bıznesti damytý jáne ınvestıtsııalyq ahýaldy jaqsartý úshin barlyq jaǵdaılardy jasaımyz. Sizdiń elden kelgen kompanııalar birlesken jobalar qurý úshin barlyq qajetti kómekti ala alady», - dedi Nurlan Noǵaev.
Atyraý oblysynyń Frantsııamen syrtqy saýda aınalymy 2018 jyldyń birinshi toqsanynda 854,9 mln AQSh dollaryn qurady. Bul ótken jyldyń sáıkes kezeńimen salystyrǵanda, 27,6%-ǵa artyq. Óńir aýmaǵynda frantsýz kapıtalynyń qatysýymen 8 kompanııa jumys jasaıdy.
Óz kezeginde Frantsııanyń Qazaqstandaǵy Tótenshe jáne Ókiletti elshisi Fılıpp Martıne oblys ákimimen eki el arasyndaǵy yntymaqtastyq boıynsha aldaǵy josparlarymen bólisti.
«Frantsııa Qazaqstanmen tyǵyz yntymaqtastyq jasaıtyn elderdiń úshtigine kiredi. Osy jyly eki el arasyndaǵy strategııalyq yntymaqtastyq týraly shartqa 10 jyl tolady. Bizdiń kompanııalarymyz sizdiń el aýmaǵyndaǵy kóptegen iri jobalarǵa qatysady. Biz jańa tehnologııalardy usynýǵa, Qazaqstan ekonomıkasynyń túrli salalary úshin kadrlar daıyndaýǵa qatysýǵa daıynbyz. Balamaly energetıkany, mádenı baılanystardy damytý, stýdentterdi Frantsııanyń joǵarǵy oqý oryndaryna oqýǵa shaqyrý bul eki el ekonomıkasyn biriktirýdiń bir bóligi ǵana, - dedi Fılıpp Martıne.
Sonymen qatar, frantsýz elshisi kóptegen jobalardy iske asyrýǵa jáne Frantsııa men Qazaqstan arasyndaǵy mádenı baılanystardy damytýǵa múmkindik beretin aldaǵy Qazaqstan-Frantsýz forýmy týraly da áńgimeledi.
Kezdesý sońynda oblys ákimi Nurlan Noǵaev óńirde ózara tıimdi yntymaqtastyqty jolǵa qoıýǵa bolatyn óte kóp salalardyń baryn alǵa tartyp, Frantsııa ókilderin Atyraý oblysyna jıi kelýge shaqyrdy.
