Atyraý oblysynyń ákimi blokposttardyń jumysyn tekserdi
ATYRAÝ. QazAqparat – Atyraý oblysynyń ákimi Mahambet Dosmuhambetov blokposttardyń jumysyn tekserdi, dep habarlaıdy QazAqparat.
30 naýryzda Atyraý qalasynda karantın, oblys aýmaǵynda júrip-turýǵa shekteý sharalary engizilgen bolatyn. Qalaǵa kiretin joldardyń 4 baǵytyna arnaıy blokpost qoıylǵan edi. Al, 2 sáýirden beri blokposttardan tek ruqsaty bar avtokólikter ǵana ótkizilýde.
Aımaq basshysy blokposttardyń jumysymen tanysyp, mamandarmen, tranzıttik júk kólikteriniń júrgizýshilerimen tildesti. Mamandardyń aıtýynsha, eshqandaı problema týyndamaǵan. Blokposttar tıisti rejımde jumys istep tur.
«Maqsat –halyqtyń densaýlyǵyn saqtaý, qaipti indettiń taralýyna jol bermeý. Blokposttardan azyq-túlik, dári-dármek syndy taýarlardyń bógetsiz ótkizilýin qamtamasyz etý qajet» -dedi oblys ákimi Mahambet Dosmuhambetov.
Atyraý qalasynyń 4 baǵytyndaǵy blokposttardyń jumysyn qamtamasyz etý úshin ishki ister organdarynan – 48 qyzmetkeri, Qorǵanys mınıstrliginiń 56 qyzmetkeri kezekshilik atqarýda. Olarǵa 12 arnaıy avtokólik bólingen. Sondaı-aq, munda densaýlyq saqtaý basqarmasynyń mamandary da jumys isteýde.
