Atyraý oblysynyń ákimi balalar úıindegi sábılerdiń tusaýyn kesti
ATYRAÝ. QazAqparat – Atyraý oblysynyń ákimi Mahambet Dosmuhambetov balalar úıindegi sábılerdiń tusaýyn kesti, dep habarlaıdy QazAqparat.
Búgin oblys basshysy Mamandandyrylǵan balalar úıiniń tárbıelenýshilerin Halyqaralyq balalardy qorǵaý kúni merekesimen quttyqtap bardy. Ákim eki sábıdiń tusaýyn da kesti.
Tusaýy kesilgen balaqaılardyń biri ata-ana qamqorlyǵynsyz qalǵan, ekinshisin múmkindigi shekteýli anasy ortalyqqa ýaqytsha tapsyrǵan.
«Týǵanynan ana meıirimin kórmeı, ósip kele jatqan balalardyń mahabbat pen qamqorlyqqa óte zárý ekenin bilemiz. Sondyqtan, balaqaılar jaqsy otbasydan jaıly oryn taýyp, týǵan eldiń laıyqty azamaty bolyp óskenin qalaımyz. Balalarǵa búgin ǵana emes, ár kún saıyn merekelik kóńil-kúı syılap, barynsha jaǵdaı jasaýymyz kerek», - dedi oblys ákimi Mahambet Dosmuhambetov.
Mamandandyrylǵan balalar úıiniń basshysy Raısa Baımuhanovanyń málimetinshe, mekemedegi bir balany qaıyrymdy otbasy asyrap alǵan. Al, 6-aýy óz otbasyna oralǵan. Bir bala otbasylyq úlgidegi «Shańyraq» balalar aýylyna aýystyrylǵan. Qazir munda túrli aýrýǵa shaldyqqan 4 jasqa deıingi 23 bala bar. Balalardyń ortalyq nerv júıesi zaqymdanǵan. Sóıleı almaıdy. Tserebraldy sal aýrýyna ushyraǵan. Munda 50 qyzmetker jumys isteıdi.
Halyqaralyq balalar kúnine oraı barlyq tárbıelenýshige syılyqtar berildi.
