Atyraý oblysynyń ákimi aımaq kásipkerleriniń túıitkilderin tyńdady
ATYRAÝ. QazAqparat - Atyraý oblysynyń ákimi Nurlan Noǵaev óńirdiń bıznes-qaýymdastyǵymen kezdesti. Kásipkerler bıznestiń damýyna kedergi keltirip otyrǵan máselelerdi ortaǵa saldy, dep habarlaıdy QazAqparat tilshisi.
Nurlan Noǵaev aldymen oblystaǵy shaǵyn jáne orta bıznesti qoldaýǵa baǵyttalǵan jumystar jaıynda aıtty. Óńirde 57 myń kásipker bıznespen aınalysady.
«Memleket basshysy shaǵyn jáne orta bıznesti ekonomıkamyzdyń draıveri dep únemi atap ótedi. Memleket tarapynan kásipkerlerge qoldaý kóp, nesıe berý baǵdarlamalary, sýbsıdııalaý, granttar bar, olar jergilikti jáne respýblıkalyq bıýdjetterdiń esebinen júzege asyrylyp jatyr. Memleket ShOB sýbektileriniń sanynyń kóbeıýine múddeli. Jergilikti atqarýshy organdar óz tarapynan barlyq qalaýshylarǵa qoldaý kórsetýge, oqytýǵa, bastapqy kapıtalmen qamtamasyz etýge daıyn , - dedi Nurlan Noǵaev.
Kezdesýge qatysýshylar monopolıstermen ózara áreket, aýyl sharýashylyǵyn sýbsıdııalaý, jańa óndiris ashý, kásipkerlik salasyn qarjylandyrý boıynsha problemalardy kóterdi.
Aımaq basshysy úsh saǵat boıy bıznes qaýymdastyqtyń saýaldaryna jaýap berdi. Memlekettik-jekemenshik seriktestikti damytý jaıy da aıtyldy.
Nurlan Noǵaev jergilikti atqarýshy bılik kásipkerlerge qashan da qoldaý kórsetýge daıyn ekenin jetkizdi. Bastysy, bıznestiń birlesken jobalarǵa qatysýǵa qyzyǵýshylyǵynyń bolýy.
