Atyraý oblysynyń 3 turǵynyna «Qurmetti azamat» ataǵy berildi
ASTANA. QazAqparat - Atyraý oblysynyń «Qurmetti azamaty» ataǵyn berý týraly sheshim oblystyq máslıhattyń 21-sessııasynda qabyldandy, dep habarlaıdy Atyraý oblystyq óńirlik kommýnıkatsııalar qyzmeti.
Saltanatty marapattaý sharasy oblystyq ákimdikte ótti. «Atyraý oblysynyń qurmetti azamaty» marapatyn Bostan Súleımenov, Nurjııan Abdolova, Mannap Meńdiǵalıev aldy.
Oblys ákimi Nurlan Noǵaev eńbek ardagerleriniń aımaqtyń ósip-órkendeýi jolynda qosqan úlesteri zor ekenin aıtty.
"Sizderdi shyn júrekten quttyqtaımyn. Bul qurmetti ataq - adal eńbekterińizdiń jemisi. Sizder salǵan sara jol bizge úlgi, búgingi jastar da sol bastamalaryńyzdy jańa jigermen, serpinmen jalǵastyrýda. Bizge aqyl-keńesterińiz, parasatty paıymdaryńyz qashan da qundy", - dep atap ótti Nurlan Noǵaev.
Súleımenov Bostan Shámshiuly - 1938 jyly 25 tamyzda týǵan. 1961 jyly Astrahan balyq ónerkásibi men sharýashylyǵy tehnıkalyq ınstıtýtyn bitirgen. 1963-1973 jyldary Baýtınodaǵy «Gýrrybholflot» basqarmasynyń bas ınjeneri boldy. Aýmaqtyq balyq ınspektsııasynda eki ret, 1974-1977, 1992-1996 jyldary basshylyq qyzmet atqardy. Ár jyldary "Gýrevbalyqónerkásibi" óndiristik birlestiginde bas dırektor, jeńil jáne azyq-túlik ónerkásibi bóliminiń, jeńil ónerkásip jáne halyq tutynatyn taýarlar bóliminiń meńgerýshisi, Gýrev oblystyq ekologııa jáne bıoresýrstar basqarmasy basshysynyń orynbasary boldy. Gýrev oblysynyń tabıǵat qorǵaý jónindegi bas memlekettik ınspektory, bas ekologııa ınspektory qyzmetterin qosa atqardy. 2000 jyldardyń basynda Halyqaralyq Kaspıı ekologııalyq baǵdarlamasynda (ıtbalyqtardy zertteý toby komıssııasynyń múshesi) qazaqstandyq taraptan sarapshy boldy.
Abdolova Nurjııan Abdolqyzy - 2 shilde 1943 jyly týǵan. 1964 jyly Almaty memlekettik aýyl sharýashylyǵy ınstıtýtyn orman sharýashylyǵy ınjeneri mamandyǵy boıynsha bitirgen. 1969 jyly Gýrev pedagogıka ınstıtýtyna túsken. 1984 jyly Almaty joǵary partııa mektebin bitirip saıasattanýshy mamandyǵyn alǵan. 1974 jyly Nurjııan Abdolovqyzy memlekettik qyzmetke ornalasqan. 1977 jyly aqpanda Novobogat (qazirgi Isataı) aýdanyna ıdeologııa máseleleri boıynsha hatshy bolyp saılandy. 1994 jyly birinshi shaqyrylǵan oblystyq máslıhattyń depýtaty boldy. Nurjııan Abdolovqyzy- Isataı aýdanynyń qurmetti azamaty. "Ajar" jýrnalynyń (Qazaqstan isker áıelder qaýymdastyǵy) «Altyn áıelder» atalymyna engen. 2011 jyly naýryzda Birinshi respýblıkalyq áıelder sezine delegat boldy. 2011 jyly sáýirde Qazaqstan Respýblıkasy Prezıdentiniń ınaýgýratsııasyna qatysty.
Meńdiǵalıev Manap Sergeleuly- 11 tamyz 1941 jyly týǵan. 1958 jyly orta mektepti aıaqtap, Ganıýshkın selosynda jóndeý-tehnıkalyq stantsııaǵa jumysqa ornalasqan. 1961-1964 jyldary Ýkraınada ásker qatarynda boldy. 1964 jyly Shymkentte Qazaq hımııa-tehnologııa ınstıtýtyna tústi. 1967 jyly Lenıngrad tehnıkalyq ınstıtýtynyń úshinshi kýrsyna túsip, 1969 jyly úzdik bitirgen. Eńbek jolyn Qostanaı oblysynda et kombınatynda mehanık bolyp bastady. 1970 jyly Gýrev et kombınatyna bas ınjener bolyp ornalasty. Jumystaǵy joǵary jaýapkershiligi elenip, 1975 jyly Gýrev et kombınatynyń dırektory bolyp taǵaıyndaldy. Eńbek jolynyń 20 jylynda oblystyq, qalalyq, aýdandyq keńesterdiń depýtaty, Gýrev qalalyq, oblystyq partııa keńesiniń múshesi, Qazaqstan kompartııasy seziniń delegaty boldy.Ekologııa, tabıǵat paıdalaný, áleýmettik salanyń damýyna úlken úles qosty. «Nur Otan» partııasynyń múshesi, salamatty ómir saltyn belsendi nasıhattaıdy.
