Atyraý oblysynyń 261 saılaý ýchaskesinde daýys sanap jatyr
Atyraý oblystyq aýmaqtyq saılaý komıssııasynyń tóraǵasy Azamat Aımanakýmovtyń málimetinshe, jergilikti ýaqytpen saǵat 20:00-de 261 saılaý ýchaskesinde daýys berý aıaqtalǵan. Qazirgi kezde daýys sanap jatyr.
«Oblys boıynsha saılaý ýchaskelerinde eshqandaı zań buzýshylyq tirkelgen joq. Múmkindigi shekteýli jandar men alys eldi mekenderdegi turǵyndardyń, vahtalyq aýysymmen jumys isteıtin jumysshylardyń, sondaı-aq tergeý ızolıatorynda qamaýda otyrǵan adamdardyń daýys berýine jaǵdaı jasaldy», - dedi Azamat Aımanakýmov.
Onyń deregine súıensek, 261 ýchaskelik saılaý komıssııasynda 1 966 azamat jumys atqarǵan. Densaýlyq saqtaý salasynyń nysandarynda, áskerı bólim men ýaqytsha qamaý ızolıatorynda 11 jabyq ýchaske ashylǵan.
Úıden daýys berýge 800-ge jýyq qarııa men múmkindigi shekteýli jandardan ótinish túsken. Máselen, І top múgedegi Larısa Boqanova densaýlyq jaǵdaıyna baılanysty úıden daýys berý úshin №43 saılaý ýchaskesine ótinim bergen.
«Búgin – elimiz úshin mańyzdy kún. Meniń densaýlyq jaǵdaıymdy eskerip, ýchaskelik saılaý komıssııasynyń músheleri bıýlletendi úıge ákeldi. Elimizdiń keleshegi úshin tańdaý jasadym», - deıdi Larısa Boqanova.
Ýchaskelik saılaý komıssııasynyń músheleri Larısa Boqanovaǵa daýys bergen soń estelik syılyq tabys etti.
Eske sala ketelik, budan buryn Atyraý turǵyndary 261 saılaý ýchaskesinde tańdaýyn jasaıtynyn, keıin munaıshylar men Baýyrjan Momyshuly daýys bergenin habarlaǵan edik.
