Atyraý oblysyndaǵy joldardyń jaǵdaıy nashar - QR Prezıdenti

ATYRAÝ. QazAqparat - Atyraý oblysynyń 2 myń avtomobıl jolynyń jartysy nashar jaǵdaıda. Bul týraly Memleket basshysy Nursultan Nazarbaev Atyraý oblysynyń áleýmettik-ekonomıkalyq damý məseleleri jóninde keńeste aıtty, dep habarlaıdy QazAqparat tilshisi.

«Oblysta 2 myń avtomobıl jolynyń jartysy nashar jaǵdaıda, ishki joldy aıtamyn. Oǵan biz endi kirisemiz. Investıtsııalar jáne damý mınıstrligimen birlesip, qazirgi istep jatqan sharýamyz Atyraýdan Aqtóbege deıin joldy, Atyraýdan Astrahanǵa deıin joldy bıyl-endigi jyly salyp bitiremiz. Qazir Atyraý Oralǵa shyǵady, tómen qaraı Mańǵystaýǵa shyǵady, Mańǵystaýdan Túrikmenstanǵa ótip, Parsy shyǵanaǵyna deıin jol ashylady», - dedi Nursultan Nazarbaev.

Memleket basshysy Qazaqstannyń qurlyqtyq memleket ekenin eske saldy.

«Bizdiń teńizge shyǵatyn jaǵalaýymyz joq. Bizdiń júk tasymaldaýymyz qıyn, tasymaldaý baǵasy joǵary. Sondan kóp qarajat joǵaltamyz. Sondyqtan meniń istegen sharýam, birinshiden Qytaımen kelisip, anaý Tynyq muhıttaǵy Lıanıýngan portynan termınal saldyq. Qytaıdyń shekarasynan Reseıge deıin úsh myń shaqyrym eń joǵary dárejeli avtokólik joly salyndy. Týra Qazaqstannyń ortasymen Jezqazǵannan Kaspıı teńizine deıin 2,5 myń shaqyrym temir jol salyndy»,- dedi Elbasy.

Nursultan Nazarbaev Túrikmenstan arqyly Bandarabas portyna shyǵyp búkil arab memleketterimen, Úndistanmen saýda-sattyq jasaý múmkinshiligi ashylǵanyn atap ótti. Al Quryq porty arqyly tikeleı Kavkazǵa, odan ary Qara teńizge, Aq teńizge shyǵý múmkindigimiz bar ekendigin aıtty.

«Qazir quryq portynan Qazaqstan arqyly Eýropaǵa, Reseıge tasymaldanatyn konteınerlerdiń kólemi jylyna 2 esege artyp otyr. Sondyqtan ınfraqurylym, jol degenimiz ósip-óný degen sóz», - dedi Memleket basshysy.