Atyraý oblysyndaǵy joldardyń sapasy tekserildi
«Jol aktıvteri ulttyq sapa ortalyǵy» RMK Atyraý oblystyq fılıalynyń bólim basshysy Nurdan Jantýrınniń aıtýynsha, jyl basynan beri 74 nysan 903 ret tekserilgen.
«Atyraý oblysyndaǵy joldardy tekserý kezinde 335 aqaý anyqtaldy. Onyń ishinde 70 órsekel aqaý bar. Joldardy qys mezgilinde kútip-ustaýǵa qatysty 34 tekserý júrgizildi. Anyqtalǵan kemshilikter boıynsha tapsyrys berýshi men joldardy kútip-ustaıtyn «Qazaqavtojol» JShS-ǵa usynym hat joldandy. Sonyń nátıjesinde 67 kemshilik joıyldy. Máselen, «Aqtóbe-Atyraý-Astrahan» tas jolynyń keıbir bólikterinde jol jıegi tegisteldi. Al, Qarabatan eldi mekeni, Maqat kenti men Qurmanǵazy aýdanynyń aýmaǵyndaǵy respýblıkalyq mańyzy bar jolda asfalt betine túsken syzattar joıyldy. Dál osyndaı syzattar «Qulsary-Dossor» jolynyń aralyǵynda, «Atyraý-Oral» baǵytyndaǵy joldyń Inder aýdany tusynda anyqtalǵan edi. Bul kemshilik te qalypqa keltirildi», -deıdi Nurdan Jantýrın.
Onyń deregine súıensek, fılıal mamandary jyl basynan beri Atyraý oblysynda salynyp jatqan joldardyń qurylysyna paıdalanǵan materıaldardan 1 614 synama alǵan. Taldaý nátıjesi 235 synamanyń elimizdegi standarttarǵa sáıkes emesi anyqtalǵan.
Eske sala ketelik, budan buryn Atyraýda jyl basynan beri júk kólikteriniń ıelerine 46 mln teńge aıyppul salynǵanyn habarlaǵan edik.
Keıin Atyraýdan Reseıge qatynaıtyn jol qurylysynan 61 aqaý tabylǵanyn jazǵan bolatynbyz.