Atyraý oblysyndaǵy Jaıyq arqyly ótetin kópir qurylysy 2018 jyly aıaqtalady
ATYRAÝ. QazAqparat - Atyraý oblysyndaǵy Jaıyq arqyly ótetin tireýsiz kópirdiń qurylysy aıaqtalady. Búgin aımaq basshysy Nurlan Noǵaev jańa kópirdiń qurylys qurylys aımaǵynda boldy, dep habarlaıdy «QazAqparat» HAA tilshisi óńirlik kommýnıkatsııalar qyzmetine silteme jasap.
Oblystyń Mahambet aýdanyndaǵy jańa kópir qosymsha kólik dálizin qurýǵa jáne oblys ortalyǵyndaǵy keptelisterdi aıtarlyqtaı azaıtýǵa múmkindik beredi. Mahambet aýyly mańyndaǵy Jaıyq ózenine salynǵan kópirdiń júk kóterimdiligi 180 tonna, uzyndyǵy - 860 metr, eni 13 metrdi quraıdy. Kireberis joldarynyń jalpy uzyndyǵy - 8,5 kılometr. Kópirdiń qurylymy da erekshe - tutastaı beton jáne tireýishterden turady.
Qazirgi ýaqytta onda avtokólik joldary salynǵan. Jumysty meılinshe jedeldetý úshin qurylys alańyna mobıldi beton zaýyty ornatylǵan. Joldyń júretin bóligi eki jolaqtan turady, jaıaý júrginshilerge arnalǵan joldar da qarastyrylǵan.
«Jańa kópir qurylysynyń aıaqtalýy aımaqtaǵy shaǵyn jáne orta bıznestiń damýyna sondaı-aq, ózennen ótý arqyly oblys ortalyǵyna toqtamaı jańa kólik dálizin qurýǵa múmkindik beredi», - dedi N.Noǵaev.
Kópir qurylysynyń aıaqtalýy 2018 jylǵa josparlanǵan. Budan ózge aımaq basshysy kóne Saraıshyq qalashyǵy mańyndaǵy jaǵalardy bekitý oryndarynda bolyp qaıtty. Jaǵa bekitýshi bógetshelerdiń qurylysy 2016 jyly bastalǵan, 2018 jyly aıaqtalady dep josparlanyp otyr. Bóget bıiktigi - 3 metr, uzyndyǵy 1500 metrdi quraıdy. Bógetter eski qala bólshekterin tasqyn sýlardan qorǵaýǵa múmkindik beredi. Eki nysandy aralaǵan Nurlan Noǵaev jaýapty tulǵalarǵa naqty tapsyrmalar berdi.
