Atyraý oblysyndaǵy tótenshe jaǵdaı boıynsha is prokýratýraǵa joldanbaq

ASTANA. QazAqparat – QR Ekologııa jáne tabıǵı resýrstar mınıstrligi Atyraý oblysynda qalyptasqan tótenshe jaǵdaılarǵa qatysty túsinik berdi, dep habarlaıdy QazAqparat mınıstrliktiń baspasóz qyzmetine silteme jasap.

Atyraý oblysynda 3-sáýir kúni birneshe tótenshe jaǵdaı boldy. «Aq Jaıyq» memlekettik tabıǵı rezervaty aýmaǵyndaǵy qamystyń órtenýi men Atyraý munaı óńdeý zaýytynyń qubyry jáne «Kazakhstan Petrochemical Industries Inc» JShS qubyrynan qara tútinniń shyǵýyna baılanysty qolaısyz meteorologııalyq jaǵdaı qalyptasty jáne jeldiń bolmaýyna baılanysty kúrdeli ekologııalyq jaǵdaı qalyptasty.

Máselen, Atyraý munaı óńdeý zaýytynda janarmaı gazyna suıyqtyqtyń túsýi saldarynan baıaý koksteý qondyrǵysyndaǵy P-2 peshiniń janý rejıminiń buzylý faktisi tirkeldi. Saǵat 10:32-de tútin shyǵyp, ol saǵat 10:47-de tútin tolyqtaı sóndirildi.

Al, saǵat 10:59-da «Kazakhstan Petrochemical Industries Inc.» JShS polıpropılen óndirý boıynsha biriktirilgen gaz-hımııa kesheninde (IGCC) 220 kV L-2025 áýe jelisindegi qysqa tuıyqtalý saldarynan «KUS» JShS-niń PGTES-da generatsııalaý qondyrǵylarynyń avarııalyq jaǵdaıy oryn aldy. Nátıjesinde, elektr qýaty úzilip, óz kezeginde ol óndiristiń ishinara toqtap qalýyna ákelip soqtyrdy.

Qazirgi ýaqytta eki kásiporynǵa qatysty tekserýdi prokýratýraǵa tirkeý jumystary júrgizilýde. Eki fakti boıynsha mán-jaı anyqtalady.

Sonymen qatar, kásiporyndardyń, ásirese, Atyraý munaı óńdeý zaýytynyń ekologııalyq kórsetkishteri kóńil kónshitpeıdi. Tabıǵatty qorǵaý zańnamasyn buzý jáne gazdy qoldaný jumystary júıeli túrde tirkelýde. Ótken jyly tıisti zańdylyqtardy buzý boıynsha dálelderge júgine otyryp Atyraý oblystyq ekologııa departamenti Atyraý munaı óńdeý zaýytynyń ekologııalyq ruqsatyn toqtatý týraly materıaldardy sotqa joldaǵan bolatyn. Alaıda, bıyl da sapanyń jaqsarmaǵanyn kórip otyrmyz.

«Osyǵan baılanysty kásiporyndar ekologııalyq kórsetkishterin jaqsartý máselesin baqylaýǵa alyp, barlyǵyn tez arada bir retke keltirýi kerek. Osy másele boıynsha mınıstrlik Atyraý munaı óńdeý zaýyty men KPI-niń bas kompanııasy – QazMunaıGazǵa jáne Samuryq Qazyna óndeý hat joldamaq»,-delingen habarlamada.

Osyǵan deıin Kaspıı jaǵalaýynda qamys órtimen kúres jalǵasyp jatqany habarlandy.