Atyraý oblysyndaǵy sý basýy yqtımal 36 eldi mekende daıyndyq kúsheıtildi
Oblystyq tótenshe jaǵdaılar departamenti tótenshe jaǵdaıdyń aldyn alý bóliminiń bastyǵy Aslanbek Ǵafızdiń málimetinshe, qańtar aıynda oblys ákimdigi kóktemgi tasqyn sý qaýpiniń aldyn alýǵa daıyndyq jumystarynyń josparyn bekitken.
«Sý tasqyny qaýpiniń aldyn alý men joıý maqsatynda keshendi jol kartasy ázirlendi. Soǵan sáıkes oblysta sý basýy múmkin 51 eldi meken anyqtaldy. Qazir 15 eldi mekende qaýip seıildi. Al, sý basýy yqtımal 36 eldi meken aýmaǵynda aldyn alý jumystary kúsheıtildi. Aımaqta sý tasqynyna qarsy is-sharalarǵa 12 tonna janar maı, 27 myńnan astam qapshyq, 10 shatyr jáne 5 myńnan astam tósek-oryn jabdyǵy qory ázirlendi. Kún saıyn Atyraý qalasynyń shetindegi baý-baqsha ujymdary ornalasqan aýmaqtaǵy sý deńgeıi baqylanyp otyr. Jeke sektordaǵy turǵyn úılerge keletin qyzyl sýdyń jolyn bógeýge 485 tonna qum, saz, qıyrshyq tas daıyndaldy», - dep habarlady Aslanbek Ǵafız.
Onyń aıtýynsha, qazir oblys aýmaǵynda sý tasqynynyń aldyn alýǵa 1 153 adam, 303 tehnıka, 16 júzý quraly men 107 motopompa daıyndalǵan. Sondaı-aq, turǵyndardy evakýatsııalaýǵa arnalǵan 109 qabyldaý pýnktiniń jaǵdaıy tekserildi.
Eske sala ketelik, buǵan deıin Atyraý oblysynda jol jyrylyp, kólik qatynasy toqtaǵanyn jazǵan edik.
Jol ýchaskesi jyrylǵannan keıin tasqyn sý deńgeıi tómendegenin habarlaǵan bolatynbyz.