Atyraý oblysyndaǵy Prezıdent rezıdentsııasy balalar qajettiligine beriledi
«Memleket basshysynyń tapsyrmasyna sáıkes qonaq kútý nysandaryn balalarǵa arnalǵan saýyqtyrý jáne demalys kesheni retinde qaıta ashý josparlanyp otyr. Osyǵan baılanysty Atyraý oblysynyń memlekettik organdary balalardyń qajettiligin zertteı bastady. Arnaıy organdardyń zerdeleýinen soń balalardy saýyqtyrý jáne demalys ortalyǵynyń keshendik maqsaty aıqyndalady», - dep habarlady Atyraý oblysy ákiminiń baspasóz qyzmetinen.
Jergilikti ákimdik Prezıdent rezıdentsııasyn qaıta jabdyqtaýdy kózdep otyr. Qonaq kútý obektisi Jaıyq ózeniniń jaǵalaýynda ornalasqan.
Eske sala ketelik, budan buryn Memleket basshysy Qasym-Jomart Toqaevtyń tapsyrmasymen Atyraýda qurylysy toqtaǵan kontsert zalynyń ornyna mádenıet ortalyǵy salynatynyn jazǵan bolatynbyz.
Al byltyrǵy qarashada Prezıdent Atyraýǵa saparynda mádenıet ortalyǵyn salyp, oǵan Qurmanǵazynyń esimin berýdi usynǵan edi.
«Oblysta mádenıet salasyn damytýǵa erekshe nazar aýdarý qajet. Qalada mádenıet oryndarynyń kóbirek bolǵany jón. Men Atyraý qalasynda daryndy jastar úshin mádenıet jáne shyǵarmashylyq ortalyǵyn salýdy tapsyramyn. Ony qazaq kúı óneriniń alyby – Qurmanǵazynyń atymen ataýdy usynamyn», - dedi Prezıdent.
Atyraý oblysy ákiminiń orynbasary Jasulan Bısembıevtiń aıtýynsha, qurylysy toqtap turǵan kontsert zaly buzylyp, ornyna Qurmanǵazy atyndaǵy óner ortalyǵy salynady.
«Atyraý qalasyndaǵy qurylysy tolyq aıaqtalmaǵan kontsert zaly buzýǵa uıǵarym jasalyp otyr. Nysan tolyq buzylǵan soń onyń ornyna jańa mádenı ortalyq salý jóninde tapsyrma berildi. Osyǵan baılanysty tıisti salanyń jaýapty mamandary usynys daıyndaıdy. Jańa mádenıet jáne shyǵarmashylyq ortalyqtyń jobasy jobalaý-smetalyq qujattama jasaqtalyp, memlekettik saraptamadan ótkennen soń tanystyrylady», -deıdi Jasulan Bısembıev.
