Atyraý oblysyndaǵy polıpropılen óndiretin gaz-hımııa kesheniniń jumysy toqtap tur
KPI JShS bas dırektory Danııar Tıesovtiń aıtýynsha, qazir keshen jumysy profılaktıkalyq jóndeýge toqtatylǵan.
«Joba boıynsha jylyna 500 myń tonna polıpropılen óndiretin tuńǵysh ıntegratsııalanǵan keshen byltyrǵy qarashada iske qosyldy. Sodan beri 105 myń tonnadan astam polıpropılen óndirildi. Keshen tolyq qýatyna shyǵyp, 100% júktememen jumys isteýi úshin kezeń-kezeńimen kepildik synaqtarǵa daıyndyq kezinde profılaktıkalyq dıagnostıka júrgizip, anyqtalǵan aqaýlardy túzetý úshin alǵashqy josparly jóndeýge toqtatyldy. Zaýyt jumysy bıyl tamyz aıynyń úshinshi onkúndiginde qaıta jalǵasady dep josparlanyp otyr», -deıdi Danııar Tıesov.
Onyń aıtyna qaraǵanda, álemde tehnologııa men óndiris kólemi jaǵynan Atyraýdaǵy keshenge uqsas 5 kompanııa Saýd Arabııasy, AQSh, Belgııa, Ońtústik Koreıa jáne Qytaıda ǵana bar. Qazaqstandaǵy iri gaz-hımııa kesheniniń iske qosylýy qurylys, medıtsına, avtomobıl jasaý, tamaq jáne toqyma ónerkásibinde polıpropılennen jasalǵan buıymdar óndirisiniń damýyna serpin beredi.
Eske sala ketelik, buǵan deıin Atyraý oblysyndaǵy gaz-hımııa kesheniniń jumysy ne sebepti toqtatylǵanyn habarlaǵan bolatynbyz.
«Gaz-hımııa kesheniniń jumysyn toqtatý osy sekildi iri kásiporyndarda kezdesip turady. Óıtkeni, iri óndiris ornynyń paıdalanýǵa berilgenine áli bir jyl tolǵan joq. Sol sebepten, keshen qurylysyn júrgizgen merdigerdiń esebinen barlyq anyqtalǵan kemshilikti retke keltirý kózdelip otyr. Biz keshendi 10 shildede toqtatyp, 25 tamyzda qaıta iske qosýdy josparlaǵan edik. Biraq, ony 5 maýsymda toqtaýǵa týra keldi. Óıtkeni, Siemens kompanııasynyń jylý almastyrǵyshynda aqaý baıqaldy», - dep habarlady Danııar Tıesov.
