Atyraý oblysyndaǵy munaıshylar daýys berip jatyr
Teńiz ken orny Jylyoı aýdanynda ornalasqan. Ken ornyndaǵy jobaǵa tartylǵan birneshe kompanııada vahtalyq ádispen jumys isteıtin munaıshylardyń daýys berýi úshin 15 jyljymaly daýys berý pýnkti jiberilgen.
«Búgin – táýelsiz elimiz úshin tarıhı kún. Biz vahtalyq jumysta júrsek te, elimizdiń erteńi, balalarymyzdyń baıandy bolashaǵy úshin óz tańdaýymyzdy jasaýǵa keldik. Jańa, ádiletti Qazaqstandy qurý úshin árkimniń daýysy mańyzdy ekenin bilemiz», -deıdi «Senimdi qurylys» kompanııasynyń qyzmetkeri Rýslan Salyqov.
Búgin Teńiz ken ornynda 14 myńǵa jýyq saılaýshynyń daýys berýine jaǵdaı jasalǵan. Saılaýshylardyń arasynda elimizdiń basqa óńirlerinen kelip, jumys istep júrgender de bar. Munaıshylar aýdan ortalyǵynan jetkizilgen jyljymaly pýnktterde óz tańdaýyn jasap jatyr.
Oblys ákiminiń baspasóz qyzmetinen málim etkendeı, munaı-gaz salasynda jumys isteıtin munaıshylar 5 saılaý ýchaskesinde daýys berip jatyr. Al, 39 saılaý ýchaskesi óndiris ornyna baryp, munaıshylardyń daýys berýin uıymdastyrady.
Sondaı-aq, Atyraý oblysynda «Qashaǵan» kenishindegi munaıshylar daýys berdi.
Soltústik Kaspıı jobasy operatory – NCOC kompanııasynyń baspasóz qyzmetinen málim etkendeı, «Samal» vahtalyq kentinde jáne D aralynda, «Bolashaq» munaı men gazdy keshendi daıyndaý qondyrǵysynda, sondaı-aq, teńizdegi keshende jumys isteıtin qyzmetkerler daýys berip jatyr. Olar daýys beretin saılaý ýchaskesiniń sany – 4-eý. Qurlyqtaǵy óndiristik nysanda 3, teńizdegi nysanda 1 saılaý ýchaskesi bar.
«Qazir NCOC komapnııasynyń qurlyqtaǵy kesheninde 574 adam, Kaspıı teńizindegi nysandarynda 152 adam jumys isteıdi. Olar óndiristen qol úzbeı daýys bere alady. Bul – birdeı daýys berý múmkindigi bar merdiger kompanııalardyń jumysshylaryn esepke almaǵandaǵy kórsetkish. Al, merdiger kompanııalardaǵy jumysshylardyń sany – 2067 adam», -dep habarlady kompanııanyń baspasóz qyzmeti.
Aýysymdyq jumystaǵy qyzmetkerler jumys kestesin jelilik basshysymen kelise otyryp, daýys bere alady. Saılaýǵa qatysý úshin qyzmetkerlerge kelisilgen keste boıynsha jumys ornynan ketýge múmkindik beriletindikten, tehnologııalyq protsess úzilmeıdi.
«Kompanııanyń teńizdegi jáne qurlyqtaǵy nysandaryndaǵy daýys berýge arnalǵan oryndar jasyryn daýys berý kabınalarymen jabdyqtalǵan. Qazaqstan Respýblıkasynyń zańnamasyna sáıkes, kóshpeli saılaý komıssııalary daýys berý kúni saılaý bıýlletenderin beretin oryndardy belgilep, arnaıy jáshikterdi ornatty. «Qashaǵan» ken ornynyń teńizdegi nysanynda daýys berýdi uıymdastyrý úshin saılaý kúni kóshpeli saılaý komıssııasy tasymaldanatyn jáshikterdi jetkizdi. Aýa raıynyń qolaısyzdyǵyna baılanysty teńiz nysanyna daýys berý jáshigin jetkizýge áýe kemesi tartyldy», -dep málim etti kompanııanyń baspasóz qyzmetinen.
Eske sala ketelik, budan buryn Atyraý turǵyndary 261 saılaý ýchaskesinde tańdaýyn jasaıtynyn jazǵan bolatynbyz.
Sondaı-aq, buǵan deıin Atyraýda úshinshi egizin kútip júrgen ana daýys bergen edi.
