Atyraý oblysyndaǵy mektepter eski ataýynan arylyp, Jambyl men Ahmettiń esimderin ıelendi
ATYRAÝ. QazAqparat - 30 qańtar kúni respýblıkalyq buqaralyq aqparat quraldarynda QR Úkimetiniń Atyraý oblysyndaǵy birqatar bilim jáne mádenıet mekemeleriniń ataýlaryn ózgertý týraly Qaýlysy jarııalandy. Qaýly alǵash resmı jarııalanǵan kúnnen bastap kúshine enedi, dep habarlaıdy QazAqparat.
Isataı aýdanynda mektep pen mádenıet úıiniń ataýy aýysty. Chapaev atyndaǵy jalpy bilim beretin bastaýysh mektep endi qazaqtyń uly aqyny Jambyldyń esimimen atalatyn bolady. Uly aqynnyń týyndylary kóptegen tilderge aýdarylǵan. Qytaı, Ulybrıtanııa, Chehııa, Slovakııa sekildi elderge Jambyldyń óleńderi tanys. Ony shyn mánindegi halyq aqyny dep ataýǵa negiz bar.
Sondaı-aq, Tuşyqudyq aýylyndaǵy mádenıet úıi endi «Narıman Úlkenbaıuly atyndaǵy mádenıet úıi» dep atalady.
Kórnekti qoǵam qaıratkeri, óner maıtalmany Narıman Úlkenbaıuly qazaq mádenıetine, teatr ónerine erekshe eńbek sińirdi. 60 jyldary Aqqystaý poselkesinde ashylǵan drama úıirmesinde qoıylymdarda oınaǵan. 1968 jyly Aqqystaý mádenıet úıiniń basshysy jáne aýdandyq halyq teatrynyń kórkemdik jetekshisi boldy. 2000 jyldary Atyraý oblystyq tarıhı-ólketaný mýzeıin basqaryp, onyń damýyna úlken úles qosty.
Mahambet aýdanyndaǵy Chkalov atyndaǵy orta mektep Ahmet Baıtursynulynyń esimin ıelendi. Qoǵam jáne memleket qaıratkeri, «Alash» partııasynyń múshesi, aǵartýshy, ǵalym-lıngvıst, ádebıettanýshy, túrkolog, aqyn jáne aýdarmashy retinde Ahmet Baıtursynulyn qazaq halqy «Ult ustazy» dep biledi.
Inder aýdanynda «Grebenşık orta mektebi» ataýy «Ábish Kekilbaıuly atyndaǵy orta mektep» bolyp ózgerdi. Belgili memleket jáne qoǵam qaıratkeri, Qazaqstannyń halyq jazýshysy, memlekettik syılyqtyń ıegeri Ábish Kekilbaıuly álem ádebıetiniń mol qazynasyn qazaq tiline aýdarýǵa erekshe eńbek sińirgen. Ol G.Mopassannyń «Per men Jan», «Ómir», Sh.Aıtmatovtyń «Erte qaıtqan tyrnalar» romandaryn qazaq tiline aýdardy. Ár jyldary halyq depýtaty bolyp saılandy, QR Memlekettik hatshysy laýazymyn atqardy.
Úkimet Qaýlysymen Atyraý agrarly-tehnıkalyq kolledjine Ońaıbaı Kóshekovtiń esimi berildi. Memleket qaıratkeri Ońaıbaı Kóshekov Keńes kezinde Qazaqstan Kompartııasy Gýrev oblystyq komıtetiniń birinshi hatshysy qyzmetin atqarǵan. Ol oblysty basqarǵan kezde Teńiz ken orny ashylyp, Atyraý-Ganıýshkıno joly salyndy, Atyraý-Maqat-Qulsary, Inder-Saǵyz-Mııaly joldary, Maqat-Inder temir joly salynyp, aımaqtyń aýyl sharýashylyǵy qarqyndy damydy.
Aıta keteıik, Atyraý oblysyndaǵy keıbir bilim jáne mádenıet mekemeleriniń ataýlaryn aýystyrý týraly Úkimet Qaýlysyna QR Premer-mınıstri Baqytjan Saǵyntaev 24 qańtar kúni qol qoıǵan.
