Atyraý oblysyndaǵy Qyzylqoǵa aýdany ákiminiń qyzmetinen nege ketkeni belgili boldy

ATYRAÝ. QazAqparat – Atyraý oblysyndaǵy Qyzylqoǵa aýdanynyń ákimi qyzmetinen ketti. Buǵan onyń aǵasy Jasulan Bısembıevtiń oblys ákiminiń orynbasary bolyp taǵaıyndalýy sebep bolǵan, dep habarlaıdy QazAqparat tilshisi.

Bul derekti oblys ákiminiń baspasóz qyzmeti rastady.

«Búgin Atyraý oblysy ákiminiń ókimimen Nursultan Bısembıev basqa jumysqa aýysýyna baılanysty Qyzylqoǵa aýdanynyń ákimi qyzmetinen bosatyldy. Ol bul qyzmetti 2019 jyldyń qarashasynan búginge deıin atqardy», - dep habarlady oblys ákiminiń baspasóz qyzmetinen.

Nursultan Oraquly 1991 jyly 24 jeltoqsanda Atyraý oblysy Qurmanǵazy aýdany Safon aýylynda dúnıege kelgen. Bilimi joǵary. 2010 jyly Atyraý agrarlyq-tehnıkalyq kolledjin, 2013 jyly M. Ótemisov atyndaǵy Batys Qazaqstan memlekettik ýnıversıtetin, 2018 jyly H. Dosmuhamedov atyndaǵy Atyraý memlekettik ýnıversıtetin bitirgen.

2013-2017 jyldary Atyraý oblysynyń tekserý komıssııasynda jetekshi maman, bas maman, bas ınspektor bolǵan. 2017-2019 jyldary oblystyq qarjy basqarmasy basshysynyń orynbasary, basshysy laýazymyn atqarǵan. 2019 jyldyń qarashasynda Qyzylqoǵa aýdanynyń ákimi bolyp taǵaıyndaldy.

Eske sala ketelik, budan buryn Atyraý oblysy ákiminiń taǵy bir jańa orynbasary taǵaıyndalǵanyn jazǵan edik.