Atyraý oblysyndaǵy kóp qabatty úıdiń páterinde bolǵan órt saldarynan eki jas bala qaza tapty
ASTANA. Tamyzdyń 18-i. QazAqparat - Atyraý oblysy, Maqat kentindegi kópqabatty úıdiń páterinde bolǵan órt saldarynan eki jas bala gazdan ýlanyp, qaza tapty, dep habarlaıdy QR Tótenshe jaǵdaılar mınıstrliginiń baspasóz qyzmeti.
Mınıstrliktiń aqparaty boıynsha, seısenbi, tamyzdyń 17-si kúni, saǵat 15.35-te Maqat kentindegi Temirjolshylar kóshesinde ornalasqan 4 qabatty úıdegi bir páterde órt bastalǵan. Onyń aýmaǵy 2 sharshy metr jerdi qurady. Baspasóz qyzmeti habarlaǵandaı, 18 adam qaýipsiz jerge kóshirildi.
Órt saldarynan gazdan ýlanǵan úsh adam aýrýhanaǵa jetkizilip, olardyń ishindegi 2 jáne 4 jasar eki bala aýrýhanada kóz jumdy.
Órt bir saǵat ótken soń sóndirildi.
