Atyraý oblysyndaǵy qamys órtin sóndirýge tikushaq tartylady
Bul týraly Atyraý oblysy ákiminiń orynbasary Jasulan Bısembıev áleýmettik jelidegi paraqshasyndaǵy tikeleı efırde aıtty.
«Atyraý oblysynda bir tikushaq bolǵan edi. Sol tikushaq apatqa ushyraǵannan keıin jaramsyz bolyp qaldy. Sol sebepten, teńiz jaǵalaýyndaǵy órtti sóndirý úshin Tótenshe jaǵdaılar mınıstrligi arqyly Mańǵystaý oblysynan tikushaq aldyrýǵa sheshim qabyldanyp otyr», -dep habarlady Jasulan Bısembıev.
Onyń aıtýynsha, qamys órti ózdiginen tutanbaıdy. Buǵan adamı faktordyń áseri bar.
«Qazir ańshylyq maýsym bastaldy. Demalys kúnderi ańǵa shyǵatyndar, balyq aýlaıtyndar tabıǵat aıasynda tamaq pisiredi. Mine, qamys órti osyndaı sebepten týyndaıtyny anyq. Aldaǵy ýaqytta soltústik Kaspıı aýmaǵynda balyq aýlaýǵa, ańshylyqpen aınalysýǵa tyıym salý máselesin qarastyryp otyrmyz. Bul úshin Kaspıı teńizi jaǵalaýynyń Astrahan oblysy men Mańǵystaý oblysyna deıingi aralyǵyn «Aqjaıyq» memlekettik tabıǵı rezervat aýmaǵyna berilýi qajet. Al, tabıǵı rezervattyń aýmaǵynda balyq jáne ań aýlaýǵa tıym salynǵan», -dep málim etti Jasulan Bısembıev.
Ákim orynbasarynyń aıtýyna qaraǵanda, órt tutanýy múmkin aýmaqty erte anyqtaý qolǵa alynǵaly otyr.
Eske sala ketelik, budan buryn Kaspıı jaǵalaýynda janǵan qamys tútini Atyraýdy basyp qalǵanyn habarlaǵan edik.
Keıin Kaspıı jaǵalaýyndaǵy qamys órti áli tolyq sónbegenin jazǵan bolatynbyz.
Sondaı-aq, atyraýlyq turǵyn kóshege protıvogaz kıip shyqty.