Atyraý oblysyndaǵy aýylǵa alma músini qoıyldy

ATYRAÝ. QazAqparat – Atyraý oblysyndaǵy Sarytoǵaı aýylynda alma beınelengen músin qoıyldy. Ony jergilikti aǵash sheberi jasaǵan, dep habarlaıdy QazAqparat tilshisi.

Mahambet aýdanynyń Sarytoǵaı aýylynda 1948 jyldan beri arnaıy baqta almanyń 17 túri ósirilgen. Almadan daıyndalǵan 3 túrli ónim elimizdiń ózge óńirlerine, Reseı Federatsııasynyń birneshe oblysy men Tatarstan, Bashqurtstan Respýblıkalaryna jiberilgen.

Keıin alma baǵy ıesiz qalǵan. Endi Sarytoǵaı aýylynda shaǵyn saıabaq ashylyp, alma beınelengen músin ornatyldy. Músinniń bıiktigi – 3 metr. Ony osy aýylda turatyn aǵash sheberi Orynǵalı Sarıev jasaǵan. Oǵan aýyldaǵy orta mektepti 1975, 1985 jyldary bitirgen túlekter qoldaý bildirgen.

«Kezinde Sarytoǵaı aýylyndaǵy baqta almanyń eń dámdisi ósirildi. Sol kezde aýyldyń úlkeni de, kishisi de alma baǵynda jumys istedi. Alma aǵashtaryna quıatyn sýdy Jaıyq ózeninen shelekpen tasýshy edik. Balalarymyz jastaıynan eńbekpen shyńdaldy. Turǵyndardyń birligi men eńbekqorlyǵynyń nátıjesinde aýylymyz alma baǵymen odaqqa tanyldy. Búginde sol alma baǵynyń orny men eskirmeıtin esteligi ǵana qaldy. Baqtyń jumysy qaıta jandandyrylsa, aýdan ekonomıkasyna paıdasy tıer edi. Al, almanyń músini – ótken tarıhtyń belgisi», -deıdi ardagerler keńesiniń tóraǵasy Ýálı Raqymjanov.

Aýyl turǵyndary shaǵyn saıabaqqa alma aǵashyn ekti.

Eske sala ketelik, budan buryn atyraýlyq sýretshi ózi turatyn aýylda galereıasyn ashqanyn habarlaǵan bolatynbyz.