Atyraý oblysyndaǵy aýylda Kásipkerlerge qyzmet kórsetetin ortalyq ashylady
ATYRAÝ OBLYSY. QazAqparat - Atyraý oblysynyń Mahambet aýylynda aýyldyq jerlerde kásipkerlikti qoldaý men damytýǵa baǵyttalǵan úsh nysan birden ashylady, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Bıznes-ınkýbator, Kásipkerlerge qyzmet kórsetý ortalyǵy jáne «Naryn» kommýnaldyq bazary jaqyn arada paıdalanýǵa tapsyrylady. Aýdandyq kásipkerlik bóliminiń aqparaty boıynsha, qazirgi ýaqytta «Naryn» bazarynda jóndeý jumystary júrgizilýde. Jóndeý aıaqtalǵannan keıin aýyl sharýashylyǵy taýarlaryn óndirýshiler munda óz ónimderin deldaldarsyz ótkize alady.
«Jalpy aýdany 4500 sharshy metr ǵımaratta aýdandyq kásipkerlik jáne týrızm bólimi, aýdandyq kásipkerler palatasy jáne Kásipkerlerge qyzmet kórsetý ortalyǵy ornalasatyn bolady. Óz isin ashqysy keletin kez kelgen adam osy jerden barlyq týyndaǵan suraqtary boıynsha keńes ala alady. Jaqyn mańda ornalasqan «Naryn» bazarynda jergilikti sharýalar óz ónimderin sata alady» - degen oıymen bólisti Mahambet aýdandyq kásipkerlik jáne týrızm bóliminiń basshysy Jeksenbaı Pazylov.
«Naryn» kommýnaldyq bazaryndaǵy baǵany negizsiz kóterýge jol bermes úshin Mahambet aýdandyq kásipkerlik jáne týrızm bóliminiń mamandary qatań baqylaý jasaıtynyn eskerte keteıik. Qazirgi ýaqytta jergilikti ákimdiktiń qoldaýynyń arqasynda aýyl kásipkerleri óz ónimderin deldaldarsyz ótkizip otyr.
