Atyraý oblysyndaǵy atys: Aýyl turǵyndary kinálilerdiń jazalanýyn talap etti
Budan buryn Atyraý oblysynda aýyl jastary arasynda atys bolyp, 6 adam jaraqat alǵanyn jazǵan edik.
Oblystyq polıtsııa departamenti baspasóz qyzmetiniń aqparatyna súıensek, 30 qazanda saǵat 19:30-da «Atyraý-Aqtóbe» tas jolynyń 331-shaqyrymyndaǵy Saǵyz aýylynyń mańynda jastar bir-birine oq atqan. Oqıǵa ornynda 6 adam jaraqat alyp, Saǵyz aýyldyq dárigerlik ambýlatorııasyna jetkizilgen.
Keıin atystan 5 adam oq jaraqatyn, 1 adam dene jaraqatyn alǵany anyqtaldy. Jaraqat alǵandardyń biri – 1985 jyly týǵan azamat aýrýhanada qaıtys bolǵan.
Atyraý oblystyq densaýlyq saqtaý basqarmasynyń baspasóz qyzmeti oq tıip, jaraqat alǵandardyń jaǵdaıy týraly aqparat taratty. Jaraqat alǵandardyń bireýi úıine jiberilgen. Bir er adam Maqat aýdandyq aýrýhanasyna jetkizilgen. Úsh adam túrli jaraqatpen oblystyq aýrýhanaǵa jatqyzylǵan.
Qyzylqoǵa aýdanyndaǵy atystan keıin polıtsııa qyzmetkerleri Saǵyz aýylynda kúsheıtilgen rejımde jumys isteýge jumyldyryldy.
Oblystyq polıtsııa departamentiniń bastyǵy, polıtsııa polkovnıgi Qamza Úmbetqalıevtyń aıtýynsha, tártip saqshylary Saǵyz aýylyn táýlik boıy patrýldep, kúsheıtilgen rejımde jumysyn jalǵastyryp jatyr. Oqıǵa ornynda Atyraý oblystyq polıtsııa departamentiniń jedel-tergeý toby jumys isteýde. Atalǵan derekke qatysty QR Qylmystyq kodeksiniń 99-babynyń 2-bóligimen (Adam óltirý) tergeý bastaldy.
Bir kúnnen soń oblystyq aýrýhanaǵa túsken úsh adamnyń jaǵdaıy ortasha aýyr jáne aýyr dep baǵalanǵanyn habarlaǵan bolatynbyz.
Oblystyq aýrýhanaǵa 1985 jyly týǵan úsh er adam túsken. Eki naýqas neırohırýrgııa bólimshesinde, úshinshi naýqas hırýrgııa bóliminde em-dom qabyldap jatyr.
Al, keshe, 2 qarashada Saǵyz aýylyndaǵy polıtsııa bólimshesine 25 áıel adam kelip, 30 qazan oryn alǵan oqıǵaǵa qatysty ádil tergeý júrgizilip, kinálilerdiń jazalanýyn suraǵan.
«Qazir oblystyq polıtsııa departamentinen kelgen arnaıy jedel top tergeý júrgizip jatyr. Tergeý isi ádil ótedi. Atyraý oblystyq polıtsııa departamenti basshysy Qamza Úmbetqalıev tergeý isin tikeleı baqylaýynda ustap otyr. Atyraý oblysynyń ákimi Mahambet Dosmuhambetov bir adam qaıtys bolǵan qandy oqıǵany baqylaýyna aldy. Sotqa deıingi tergep-tekserý derekteri jarııa etýge jatpaıdy» - dep málim etti Qyzylqoǵa aýdany ákimi Nursultan Bısembıev.