Atyraý oblysyndaǵy at báıgesinde 13 jasar shabandoz bas júldege ıe boldy
Mahambet aýdanyndaǵy Keńóris aýylynda Konstıtýtsııa kúnine oraı qazaqtyń ulttyq oıyndarynan báıge ótti. Oblystyq ákimdiktiń qoldaýymen ótken ulttyq oıyndarǵa komandalyq kókpar, qyz qýý, alaman jáne qunan báıge kirdi.
Qunan báıgeniń qashyqtyǵy – 12 shaqyrym. Máre syzyǵyn 19 shabandozdyń arasynan 13 jasar Saǵyndyq Aldanbaıdyń júırigi birinshi bolyp kesti.
Jasóspirim shabandoz Jylyoı aýdanynyń Qosshaǵyl aýylynda turady. Báıgege at qosqanyna eki jyl bolǵan. Júıriginiń aty – Baıan.
«Byltyr Jylyoı aýdanynda ótken «Altyn taı» báıgesinde jeńimpaz atandyq. Meni shabandozdyqqa aǵaıym Jastalap Tańqaev baýlydy», - deıdi shabandoz bala Saǵyndyq Aldanbaı.
Qunan báıgeniń bas júldegeri Saǵyndyq Aldanbaıǵa 500 myń teńge berildi. Al, ekinshi júldeni Jańaózen qalasynan qatysqan shabandoz Tańatar Súısinov, úshinshi oryndy Batys Qazaqstan oblysynyń turǵyny Ashat Kameshev ıelendi.
Ulttyq oıyndardyń taǵy biri – qyz qýý. Bul saıysqa Atyraý oblysynyyń ár aýdanynan bes arý qatysty. Olar – Darııa Erbol, Nurshat Álıhan, Fatıma Orynǵalı, Qymbat Asylhan, Sáýle Asankeldi.
«Bizdiń birneshe tulparymyz bar. Qyz qýýǵa alǵash ret qatystym», - deıdi Darııa Erbol.
Erejege sáıkes, jigit qyzdy qýyp jetip, belbeýinen sharfty julyp alýy kerek. Bul joly at ústindegi arýlardyń joly boldy. Arýlar mingen tulparlarǵa jigitterdiń júırigi jete alǵan joq.
Eske sala ketelik, budan buryn atyraýlyq sheber Nurlybek Bısembaev aıyna 100 dombyra jasaıtynyn habarlaǵan bolatynbyz.