Atyraý oblysyndaǵy «Aqjaıyq» qoryǵynda 19 ga jer órtenip ketti
ATYRAÝ. QazAqparat - Atyraý oblysyndaǵy Kaspıı teńiziniń jaǵalaýyndaǵy «Aq jaıyq» tabıǵı rezervatynda 19 ga jer órtenip ketti. Bul aımaqta órt qaýipi áli de bar, dep habarlaıdy «QazAqparat».
«Osy ýaqytta birneshe órt oshaǵy sóndirildi. Bul jerde batpaqty aımaqty basyp ketken 19 ga jerdegi qamys pen qoǵa órtendi. Órtti sóndirýge 10 dana tehnıka men 40 adam jumyldyryldy. Alaıda munda tez tutanýy múmkin ósimidkter kóp bolǵandyqtan órt qaıta órshýi ábden yqtımal. Sol sebepti biz janyp ketken aımaqty tekserip, jalpy jaǵdaıdy baqylap otyrmyz»,-deıdi Atyraý oblystyq Tótenshe jaǵdaılar departamenti, órt sóndirý men apattan qutqarý qyzmeti memlekettik mekemesi bastyǵynyń orynbasary Nurbek Nuralın.
Aıta keteıik, memlekettik tabıǵı rezervat aınalasyndaǵy qamys pen qurǵaǵan shópten osydan úsh kún buryn órt tutanǵan bolatyn. «Aq jaıyq» memlekettik tabıǵı rezervaty Atyraýdan birneshe km qashyqtyqta Kaspıı teńiziniń jaǵalaýynda ornalasqan. Munda jergilikti turǵyndar qamysty ádeıi órtep turady. Órt sodan da órshýi múmkin. Jergilikti turǵyndar eski qamysty órtegen soń, onyń ornyna malǵa azyq bolatyn jańa qamys ósip shyǵady.
