Atyraý oblysyndaǵy 25 avtogaz quıý beketine gaz jetkizildi
Oblystyq energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Danııar Muqyshevtyń málimetine súıensek, tutynýshylardy suıytylǵan munaı gazymen qamtamasyz etý maqsatynda «PromGaz» jáne «Teńizshevroıl» JShS-men kelisim shart jasalǵan.
Soǵan sáıkes 1600 tonna suıytylǵan munaı gazy alynady. Qazir óńirge 264 tonna gaz jetkizilgen.
«Energetıka mınıstrliginiń josparyna sáıkes gazben qamtý kásiporyndaryna qosymsha 1000 tonna gaz alý úshin kelisimshart júrgizilip jatyr. Máselen, «Qazaq oil» mekemesimen aradaǵy kelisimge sáıkes 700 tonnadan 350 tonnasy, «Gas Processing» JShS-dan 400 tonna gazdyń 250 tonnasy jetkizildi. Sondaı-aq «SNPS-Aqtóbe» JShS-nen 1000 tonna gaz alý úshin qosymsha kelisimshartqa otyrdy. Kelisimshart nátıjesinde Atyraý qalasyndaǵy 10, aýdandardaǵy avtogaz quıatyn 15 bekette suıytylǵan gaz satylyp jatyr. Qazir oblystaǵy kógildir otynnyń qaldyq qory 300 tonnany quraıdy. Energetıka mınıstrligimen bólingen gazdyń qoryy aı sońyna deıin jetedi dep josparlanǵan. Al, «AMÓZ» JShS tolyqqan iske qosylǵan soń kelesi aıdan bastap suıytylǵan munaı gazynyń tapshylyǵy bolmaıdy», -dedi Danııar Muqyshev.
Qazir Atyraý oblysynda 29 gazben jabdyqtaýshy mekemeniń 96 avtogaz quıý beketi bar.
Suıytylǵan munaı gazyna aılyq qajettilik 5 774 tonnany qurasa, táýliktik qajettilik – 270 tonna.
«Avtogaz quıý beketterinde shektik baǵa – 50-55 teńge. Eger gaz bul baǵadan qymbatqa satylsa, Atyraý oblysynyń ákimdigine aryz túsirýge bolady», -dep málim etti Danııar Muqyshev.
Eske sala ketelik, buǵan deıin Atyraý oblysynda avtogaz tapshylyǵyn joıý máselesi qolǵa alynǵanyn jazǵan edik.
