Atyraý oblysynda jylý berý naqty bir dataǵa baılanbaǵan - JEO
ATYRAÝ. QazAqparat - Atyraý oblysynda úıler men áleýmettik nysandarǵa jylý berý naqty bir dataǵa baılanysty emes, dep habarlaıdy «QazAqparat» HAA tilshisi.
«Nege ekeni belgisiz, áleýmettik nysandarǵa jylý 1 qazan kúni, al turǵyn úılerge 15 qazanda beriledi degen pikir qalyptasqan. Biraq olaı emes. Aýrýhanalarǵa, balabaqshalar men mektepterge kez kelgen ýaqytta jylý berýge daıynbyz. Eger aýanyń ortasha temperatýrasy úsh kún boıy 8 gradýs nólden joǵary bolsa, turǵyn úılerge jylý beriledi. Ortasha temperatýra bylaı anyqtalady: túndegi eń tómen kórsetkish pen kúndizgi eń joǵary kórsetkish alynady. Tsıfrlar qosylyp, ekige bólinedi. Jergilikti atqarýshy organdardyń tıisti sheshimimen basqa temperatýralar jaǵdaıynda da jylý beriledi», - dedi «QazAqparat» HAA tilshisine bergen suhbatynda Atyraý jylý elektr ortalyǵynyń eńbekti qorǵaý jónindegi bas tehnıkalyq jetekshisi Mıhaıl Borısenko.
JEO-daǵylardyń aıtýynsha, jazda saǵatyna 160 tonna bý jiberýge qaýqarly eki bý qazandyǵy jóndeldi, taǵy bir qazandyqty jóndeý jumystary aıaqtalýda.
Qazirgi kezde Atyraýda aýa temperatýrasy túnde 5 gradýstan tómen túspeıdi, al kúndiz 17 gradýsqa deıin jylynady.
