Atyraý oblysynda jylý berý 15 qazanda bastalady
Atyraý oblystyq energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Danııar Mýkıshevtiń málimetine súıensek, osy kezge deıin óńirde 13,2 shaqyrym jylý, 0,8 shaqyrym sý jáne 647,9 shaqyrym elektr jelilerine tolyqtaı jóndeý jumystary júrgizilgen.
«Jylý berý maýsymyna daıyndyq júrgizý úshin jergilikti bıýdjet esebinen 1,2 mlrd teńge qarajat bólindi. Al komýnaldyq qyzmet kórsetetin kásiporyndardyń óz qarajaty esebinen 2 mlrd teńge jumsaý josparlandy. «AtyraýJylýElektrOrtalyǵy» aktsıonerlik qoǵamy tarapynan №2, №11 jylý agregattaryna kúrdeli jóndeý jumysy júrgizildi. Qazir №9 jylý agregaty jóndelip jatyr. Aldaǵy ýaqytta №5 jylý agregaty da jóndeledi», - deıdi Danııar Mýkıshev.
Onyń aıtýynsha, 19 qyrkúıekte kópqabatty turǵyn úılerdegi jylý jelilerin synaqtan ótkizý bastalady. Barlyq turǵyn úı 15 qazanǵa deıin jylý berý maýsymyna tolyqtaı daıyn bolady. Óńirde 15 qazanda jylý berý bastalady.
Qazir eki bilim ordasy men 7 densaýlyq saqtaý nysanynda kúrdeli jóndeý jumystary atqarylyp jatyr. Al qalǵan nysan jylytý maýsymyna tolyqtaı daıyn.
Eske sala ketelik, budan buryn Majar ınvestory Atyraýda kúnnen energııa alý jobasyn usynǵanyn jazǵan bolatynbyz.