Atyraý oblysynda jyl boıy qyzmet kórsetetin lager salynady
ATYRAÝ. QazAqparat - Atyraý oblysy Kaspıı teńiziniń jaǵasyna jyl boıy jumys isteıtin balalar lageri salynady, dep habarlaıdy «QazAqparat» HAA tilshisi.
«Jyl boıy jumys isteıtin 500 oryndyq balalardyń oqý-saýyqtyrý lageriniń qurylysyn bastaý týraly bastamamen oblys ákimine júgindik. Usynysymyz qabyldandy. Lager Atyraýdan 170 km qashyqtyqta ornalasqan Zabýrýn aýyldyq okrýginde salynady dep josparlanyp otyr. Bul jobaǵa qarajat bólinip, memlekettik jospar da ázirlendi. Joba tujyrymdamasy balalar ortalyǵynda túrli sport alańdaryn, basseınder, jatyn bólmeler, oqý kabınetterin qamtıdy. Lager respýblıkalyq deńgeıde bolady dep kútilýde», - dedi Isataı aýdanynyń ákimi Marat Murzıev.
Aýdan basshysynyń aıtýynsha, lager qurylysynyń jobasymen tanyspas buryn, ol Zabýrýn aýylyndaǵy qurylys ornyn ózi baryp teksergen. Ol jerde jergilikti turǵyndar kelip sýǵa túsetin jaǵajaı ornalasqan.
«Jaǵajaıdy da qalpyna keltirýdi josparlap otyrmyz, sol sebepti Zabýrýnda tek balalar ǵana emes, eresekter de demala alatyn bolady. Bul jobanyń tartymdylyǵy sol, barlyq qajetti ınfraqurylymdar júrgizilgennen keıin, bul jerge kásipkerler de kele bastaıdy», - dedi Murzıev.
