Atyraý oblysynda jyl basynan beri jol apatynan 78 adam mert boldy
Oblystyq polıtsııa departamentiniń baspasóz qyzmetinen málim etkendeı, jyl basynan bergi 10 aıda 286 jol-kólik oqıǵasy tirkelgen.
«Oblys aýmaǵyndaǵy jol-kólik oqıǵalarynyń saldarynan 78 adam mert boldy. Jol apatynan 340 adam ártúrli dene jaraqatyn aldy. Ótken jylmen salystyrǵanda jol-kólik oqıǵasy 17, adam ólimi 36, dene jaraqatyn alǵandar sany 18%-ǵa ósken», -dep habarlady departamenttiń baspasóz qyzmeti.
Osy kezeńde jasóspirimderdiń quralyn basqarýynyń saldarynan bolǵan 6 jol apaty tirkelip otyr. Jol apatynan 1 jasóspirim qaza taýyp, 9-y zardap shekken.
Máselen, 9 qarashada Qurmanǵazy aýdanynda turatyn 14 jastaǵy jasóspirim ata-anasynyń ruqsatynsyz Toyota Corolla kóligin aıdap ketip, jol jıegine aýdarylǵan. Saldarynan kámeletke tolmaǵan júrgizýshi mert bolyp, onyń qasyndaǵy 4 jasóspirim ártúrli dene jaraqatymen aýrýhanaǵa tústi.
Al, 10 qarashada «Aqtóbe-Atyraý-Reseı Federatsııasynyń shekarasy» baǵytyndaǵy tas joldyń 326-shaqyrymynda Chevrolet avtokóliginiń júrgizýshi araqashyqtyqty saqtamaǵan. Sóıtip, aldynda kele jatqan Toyota avtokóligine soǵylǵan. Jol-kólik oqıǵasynan Chevrolet avtokóligindegi 3 jolaýshy ártúrli dene jaraqatymen oblystyq aýrýhanaǵa jetkizildi.
Jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń aıtýynsha, jol-kólik oqıǵasy birneshe sebeptiń saldarynan bolady. Birinshiden, qarsy baǵyttaǵy jolaqqa shyǵý, ekinshiden, jaıaý júrginshilerdi qaǵý, úshinshiden, jol qıylystarynan ótý erejesin buzý, tórtinshiden, jyldamdyqty shamadan tys asyrý, besinshiden, araqashyqtyqty saqtamaýdyń kesiri tıedi.
Eske sala ketelik, budan buryn Atyraýda kólik aýdarylyp, júrgizýshi men eki jolaýshy aýrýhanaǵa túskenin habarlaǵan edik.