Atyraý oblysynda jyl basynan beri sybaılas jemqorlyq deregimen 26 adam sottalǵan
Sybaılas jemqorlyqqa qarys is-qımyl agenttigi Atyraý oblystyq departamentiniń basshysy Erlan Dosanovtyń málimetinshe, sybaılas jemqorlyq qylmysynyń táýekeli qurylys salasynda jıi anyqtalyp otyr.
«Birinshi basshydan baǵynyshty qyzmetkerleriniń sybaılas jemqorlyq úshin deres jaýapkershilik suralady. Sol sebepten, sybaılas jemqorlyq qylmysyn boldyrmaý úshin arnaıy karta engizildi. Osyndaı is-sharalardyń nátıjesinde 417 mln teńgeden astam qarajatty jymqyrý qaýpiniń aldyn alyp otyrmyz. Departament qyzmetkerleri taýarlarǵa, kórsetiletin qyzmetterge baǵany qoldan kóterý deregine qatysty memlekettik satyp alý konkýrstaryna júrgizgen monıtorıngtiń nátıjesimen 4 mlrd teńgeden astam qarajat únemdeldi. Bıylǵy jyldyń 11 aıynda sybaılas jemqorlyq deregimen 26 adam sottaldy. Onyń ishinde birinshi basshy laýazymyn atqarǵan 3 adam bar», -dedi Erdan Dosanov.
Onyń aıtýynsha, memlekettik organdar basshylarynyń tarapynan tıisti baqylaý jasalmaıdy. Bul áleýmettik nysandar men jol qurylysyn merziminde tapsyrmaýǵa ákelip soqtyrady. Al, sybaılas jemqorlyqqa qarsy mádenıetti qalyptastyrý baǵytynda formaldy tásilder qoldanylady.
Máselen, Isataı aýdanynyń ákimdigi úı qurylysy bitpese de, merdigerge 330 mln teńgeni aýdaryp jibergen. Al, Jylyoı aýdanynda mektepti jóndeý kezinde 20 mln teńgeniń jumysy atqarylmaǵany anyqtalǵan. Sondaı-aq, Maqat aýdanynda turǵyn úı qurylysyna bólingen bıýdjetten 43 mln teńge jymqyrylmaq bolǵan.
