Atyraý oblysynda jyl basynan beri sýǵa ketken 11 adamnyń úsheýi – bala
Atyraý oblystyq tótenshe jaǵdaılar departamenti bastyǵynyń orynbasary, azamattyq qorǵaý polkovnıgi Asqat Erjanovtyń málimetinshe, bıylǵy sýǵa batqan adamdar sany azaıǵan.
«Bıylǵy jyl basynan 7 qyrkúıekke deıin sý aıdyndaryna 11 adam, onyń ishinde 3 bala batyp, jantásilim etti. Al shomylý kezeńi bastalǵan 15 maýsymnan beri sýǵa batqan 9 adam qaza tapty. Onyń ishinde 2 bala bar. Jaıyq ózeniniń Atyraý qalasyndaǵy Geolog eldi mekeni tusynda sýǵa batqan bir balany izdestirý áli jalǵasyp jatyr», -dep habarlady Asqat Erjanov.
Onyń deregine súıensek, tótenshelikter 7 adamdy qutqaryp qalǵan.
Al, sýdaǵy qaýipsizdikti buzǵan adamdarǵa 2 mln 385 myń teńge aıyppul salynǵan.
«Statıstıkaǵa sáıkes, sýǵa batý dereginiń birneshe sebebi anyqtalyp otyr. Birinshiden, eresek turǵyndardyń sýdaǵy qaýipsizdik talaptaryn saqtamaı, mas kúıinde shomylýy ókinishti oqıǵaǵa uryndyrady. Ekinshiden, shomylý kezinde óz kúshin asyra baǵalaýdyń keri áseri bar. Úshinshiden, ata-analar balalaryn qadaǵalaýsyz qaldyryp, sý aıdyndaryna óz betimen shomylýǵa jiberedi», -dep málim etti Asqat Erjanov.
Eske sala ketelik, budan bir aı buryn Atyraýda tyıym salynǵan jerde shomylǵan er adam Jaıyqqa batyp ketkenin habarlaǵan bolatynbyz.
