Atyraý oblysynda jyl basynan beri 90-ǵa jýyq bala joǵalǵan
Oblystyq polıtsııa departamentiniń baspasóz qyzmetinen málim etkendeı, jyl basynan beri kámeletke tolmaǵan balalardyń joǵalýyna baılanysty 89 derek tirkelgen.
«Atyraý oblysynda balalardyń joǵalý deregi kóbeıip otyr. Bıylǵy jyl basynan beri balalardyń joǵalýyna baılanysty 89 deregi tirkeldi. Bul – alańdatarlyq jaıt. Polıtsııa qyzmetkerlerine balalary úıine oralmaǵannan keıin 73 ata-ana habar bergen. Mektep qyzmetkerlerinen 6 habar tústi. Turǵylyqty meken-jaıyn taba almaı adasqan balalar týraly 9 adam habar berdi», -deıdi jergilikti polıtsııa qyzmeti basqarmasy bastyǵynyń orynbasary, polıtsııa podpolkovnıgi Abzal Álipqalıev.
Onyń aıtýynsha, ata-analar kámeletke tolmaǵan jasóspirimder úıge kelmegen jaǵdaıda, óz erkimen izdestirý jumystaryn uzaqqa sozbaı, dereý polıtsııaǵa habar bergeni jón.
«Bul joǵalǵan balalardy izdestirý jumystarynyń sátti aıaqtalýyna óz septigin tıgizedi. Kóp jaǵdaıda ata-analar balalarynyń úıge kelýin kútip, oqıǵany jasyrýǵa tyrysady. Máselen, bir ata-ananyń balasy saaqqa barý úshin kúndizgi 12:00-de úıinen shyǵyp ketken. Alaıda, sabaqtan keıin úıine ýaqytyly kelmegen. Biraq, bul týraly ata-anasy polıtsııa qyzmetkerlerine túngi 01:30 shamasynda ǵana habarlady. Mundaı jaıt balany dereý izdestirýge qıyndyq keltiredi. Degenmen, polıtsııa qyzmetkerleri joǵalǵan balany taýyp, ata-anasyna aman-esen tapsyrdy», -dep málim etti Abzal Álipqalıev.
Eske sala ketelik, buǵan deıin Atyraý oblysynda 173 jasóspirim erte júktilik esebine alynǵanyn habarlaǵan bolatynbyz.
