Atyraý oblysynda jyl basynan beri 8 adam sýǵa batyp ketti
ATYRAÝ. QazAqparat – Atyraý oblysynda jyl basynan beri 8 adam sýǵa batyp ketti. Onyń ishinde 2 bala bar, dep habarlaıdy QazAqparat.
Oblystyq tótenshe jaǵdaılar departamentiniń qoǵammen baılanys tobynan málim etkendeı, sýǵa ketý deregi bıylǵy 22 qańtarda tirkelgen.
«Jyl basynan beri 8 adam sýǵa batyp ketti. Onyń ishinde 2 bala bar. Bıylǵy 22 qańtarynda 9 jasar bala Atyraý qalasyndaǵy «Peretaska» kanalynda muz astyna túsip ketip, shyǵa almaı qalǵan. Al, 4 maýsymda Jylyoı aýdanynyń Jem aýyldyq okrýginde 2009 jylǵy jasóspirim arnaıy jabdyqtalmaǵan jerde sýǵa túsip, batyp ketti», -dep habarlady departamenttiń qoǵammen baılanys toby.
Qoǵammen baılanys tobynyń málimetinshe, 2020 jyly 17 adam, onyń 4 bala sýǵa túsý kezinde kóz jumǵan. Al, byltyr 28 adamnyń ajaly sýdan bolǵan. Onyń ishinde 10 bala bar.
«Ótken jylǵy 1 maýsym-31 tamyz aralyǵyndaǵy sýǵa shomylý maýsymy kezinde Atyraý qalasynda 11, Mahambet aýdanynda 4, Jylyoıda – 2, Qurmanǵazyda – 2, Inder aýdanynda 2 qaıǵyly oqıǵa tirkeldi. Júrgizilgen taldaýǵa sáıkes sýǵa batyp ketýdiń birneshe sebebi anyqtalyp otyr. Máselen, 4 adam tyıym salynǵan jerde sýǵa túsken. Sýǵa qulaýdyń saldarynan 10 adam jantásilim etti. Mas kúıde shomylyp júrgen 4 adam kóz jumdy. Al, eresekterdiń qaraýynsyz júrgen 10 bala sýǵa batyp ketti. Qutqarýshylar 4 adamdy qutqaryp qaldy. Onyń 4 bala bar», -dep málim etti qoǵammen baılanys tobynan.
Búgin, 16 maýsymda tótenshe jaǵdaılar departamentiniń qyzmetkerleri «Atyraý» dene shynyqtyrý-saýyqtyrý kesheni mańyndaǵy jaǵajaıda ata-anasynyń qaraýynsyz shomylyp júrgen 20-dan astam kámeletke tolmaǵan balany anyqtady.
Eske sala ketelik, budan buryn Atyraý oblysynda bıylǵy bes aıda 5 adam sýǵa batyp ketkenin habarlaǵan edik.
