Atyraý oblysynda jyl basynan beri 57 ekonomıkalyq qylmys tergeldi
Bul týraly BAQ ókilderimen ótken brıfıngte Atyraý oblysy boıynsha ekonomıkalyq tergeý departamenti uıymdastyrý-baqylaý basqarmasynyń basshysy Bekbolat Ánesov málim etti. Brıfıngke departamenttiń basqarma basshylary qatysty.
«Atyraý oblysynda jyl basynan bergi 9 aıda ekonomıkalyq tergep-tekserý departamenti qyzmetkerleriniń tergeýine 57 qylmystyq is tústi. Onyń ishinde 32 qylmystyq isti tergeý aıaqtaldy. Bul barlyq qylmystyq istiń 56,1 paıyzyn quraıdy. Óńirdegi sottardyń qaraýyna 23 qylmystyq is (40,3%) joldandy. Qylmystyq ister boıynsha keltirilgen zalal mólsheri – 2,9 mlrd teńge. Bul qarjynyń 2,3 mlrd teńgesi bıýdjetke qaıtaryldy», -dep málim etti Bekbolat Áneov.
Onyń aıtýynsha, osy kezeńde zańsyz shot-faktýralardy jazý, senip tapsyrylǵan bóten múlikterdi ysyrap etý nemese ıelený derekteri anyqtalǵan. Sondaı-aq, monopolıster tarapynan tarıf baǵasyn negizsiz ósirýge, zańsyz oıyn bıznesine, munaı jáne munaı ónimderin zańsyz tasymaldaýǵa, saqtaýǵa, qarjy pıramıdasyna qatysty qylmystyq ister tergelgen.
«Óńir turǵyndarynan qarjy pıramıdalarynan saqtanýdy suraımyz. Deartament qyzmetkerlerimen jedel izdestirý is-sharalary júrgizilip, qarjy pıramıdasy túrinde jumys istegen 120 áleýmettik medıa saıt pen akkaýnt jabyldy», -dedi Bekbolat Ánesov.
Eske sala ketelik, budan buryn Atyraý oblysynda qarjy pıramıdalarynan 500 adam zardap shekkenin habarlaǵan bolatynbyz.