Atyraý oblysynda jyl basynan beri 41 kólik órtenip ketti

ATYRAÝ. QazAqparat – Atyraý oblysynda bıylǵy 7 aıda 41 kólik órtenip ketti. Onyń basym bóligi elektr jabdyǵynyń buzylýynan órtengen, dep habarlaıdy QazAqparat.

Oblystyq tótenshe jaǵdaılar departamenti qoǵammen baılanys tobynyń málimetinshe, jyl basynan bergi 7 aıda 41 kóliktiń órtený deregi tirkelgen.

«Qazir avtokólik turǵyndar qozǵalysynyń ajyramas bir bóligine aınaldy. Avtokólik –óte kúrdeli mehanızm. Sol sebepten, avtokóliktiń túrli bólshegin únemi tekseristen ótkizip, ásirese, órt qaýipsizdigin baqylaýda ustaý qajet. Alaıda, júrgizýshiler bul talapty eskere bermeıdi. Sonyń saldarynan Atyraý oblysynda bıylǵy 7 aıda 41 avtokólikte órt oqıǵasy tirkeldi. Onyń ishinde 17 júk, 23 jeńil kólikti jalyn sharpydy», -dep habarlady departamenttiń qoǵammen baılanys toby.

Belgili bolǵandaı, avtokóliktegi órttiń shyǵýyna birneshe sebep áser etken.

Máselen, elektr jabdyqtarynyń buzylýynan 28, janar-jaǵar maı júıesiniń aqaýynan 6, kólik salonynda shylym shegýdiń saldarynan 7 kólik órtengen.

Osyǵan baılanysty tótenshe jaǵdaılar departamenti júrgizýshilerden avkóliktiń tehnıkalyq qaýipsizdigine basa kóńil bólýdi usynyp otyr.

Ásirese, órt qaýipsizdigi talaptaryn saqtaý qajet.

«Avtokólikti der kezinde tehnıkalyq baıqaýdan ótkizip, ásirese, elektr jelisiniń symdaryna nazar aýdarylýy tıis. Kólikte órt sóndirgish qural bolǵany jón. Avtokólikte jalyn sharpyǵan jaǵdaıda qozǵalysty tejep, órt sóndirgish quralyn paıdalaný kerek. Jalyndy sóndirýge topyraq pen qumdy paıdalanýǵa bolady. Janarmaı tógilgen jaǵdaıda, lapyldap janyp ketpes úshin oǵan sý men kóbik, nemese topyraq seýip tastaǵan durys», -dep málim etti qoǵammen baılanys tobynan.

Eske sala ketelik, buǵan deıin Atyraý oblysynda jemis tıelgen Gazel kóligi jolda órtenip ketkenin habarlaǵan bolatynbyz.