Atyraý oblysynda jyl basynan bergi bir aıda 16 avtokólik órtengen
Atyraý oblystyq tótenshe jaǵdaılar departamentiniń memlekettik órt baqylaý basqarmasy bastyǵynyń orynbasary Dáýren Berdenovtiń málimetinshe, bul ótken jylǵy kórsetkishpen salystyrǵanda, 34 paıyzǵa kóp.
«Byltyrǵy qańtar aıynda 6 kólik órti tirkelgen edi. Al, bıylǵy jyl basynan bergi bir aıda 16 kólik órtenip ketti. Máselen, Atyraý qalasynda 4, Jylyoı men Qurmanǵazy aýdanynda 2, Mahambet, Maqat, Inder aýdandarynyń árqaısysynda bir kólikti jalyn sharpydy. Órtke oranǵan tehnıkalardyń 87 paıyzy – jeńil, 12 paıyzy – júk kóligi. Onyń ishinde kólikterdiń 43 paıyzy elimizde tirkeýde turǵan bolsa, 56 paıyzy ózge memleketterde tirkelgeni anyqtaldy. Avtokólik órtiniń basym kópshiligi elektr jelisiniń qysqa tuıyqtalýynan bolyp otyr», -dep habarlady Dáýren Berdenov.
Onyń aıtýynsha, kóliktiń órtenýine elektr qondyrǵylardy montajdaý jáne paıdalaný kezinde órt qaýipsizdigi erejelerin saqtamaý sebep bolǵan. Ásirese, zaýyttan 2001-2010 jyldary aralyǵynda shyǵarylǵan sheteldik jáne reseılik «VAZ» markaly avtokólikter kóbirek órtengen.
«Júrgizýshiler avtokólikti der kezinde tehnıkalyq baqylaýdan ótkizip turýdy esten shyǵarmaǵany jón. Bul – órt qaýipsizdiginiń aldyn alýdyń basty sharasy», -dep málim etti Dáýren Berdenov.
Eske sala ketelik, budan buryn Atyraý oblysynda eki kúnde 3 kólik órtenip ketkenin habarlaǵan bolatynbyz.