Atyraý oblysynda jyl basynan 1,2 myń ga orman alqaby órtengen
Oblystyq Tótenshe jaǵdaılar departamentiniń qoǵammen baılanys tobynan málim etkendeı, byltyr 7 orman órti tirkelgen.
«Bıyl Atyraý oblysynyń orman qoryndaǵy 1246 gektardy sharpyǵan 3 órt oqıǵasy tirkeldi. Bul byltyrǵy kórsetkishpen salystyrǵanda 42 ese tómen. Al turǵyndar tarapynan abattandyrý, qýraǵan shópterdi órteý kezinde otty qaraýsyz qaldyrý saldarynan shabyndyq jerlerde, ashyq alańdarda, avtojol boıy men kanal jaǵalaýynda 91 gektar aýmaq janyp ketti», - dep habarlady vedomstvodan.
Qazir órt qaýipsizdigi erejesiniń buzylýyn boldyrmaý úshin turǵyndar arasynda profılaktıkalyq túsindirý jumysy júrgizilip jatyr.
«Orman men dalalyq alqaptarda órt qaýipsizdigi erejelerin buzǵany úshin kináli adamdar jergilikti atqarýshy organdar, polıtsııa, orman sharýashylyǵy men tótenshe jaǵdaılar qyzmeti qyzmetkerlerinen quralǵan mobıldi top arqyly ákimshilik jaýapkershilikke tartylady.
Sol sebepten, oblys turǵyndary men qonaqtary órt qaýipsizdigi erejesin qatań saqtaýy tıis.
Birinshiden, shabyndyq, egistik, orman alqaptarynda qýraǵan shópterdi, qoqystardy órtep, baqylaýsyz qaldyrýǵa jol berilmeýi kerek.
Ekinshiden, aýa raıy qurǵaq, ystyq jáne qatty jel kezinde ot jaqpaǵan jón.
Úshinshiden, tabıǵat aıasyndaǵy demalys aıaqtalǵan kezde janǵan otty sý quıyp, qum nemese topyraq seýip, tolyq óshkenine kóz jetkizgen durys. Eń bastysy, órtti óz kúshińizben sóndirý múmkin bolmasa, 101, 112 nómirleri arqyly habarlaý qajet», - dep málim etti qoǵammen baılanys tobynan.
