Atyraý oblysynda júkti áıel janarmaı beketinde bosandy
ATYRAÝ. QazAqparat - Atyraý oblysynda janarmaı quıý beketteriniń birinde jumys isteıtin operator-kassırler júkti áıeldi sátti bosandyryp aldy, dep habarlaıdy QazAqparat tilshisi.
Dossordan Atyraýǵa bara jatqan tasjolda ornalasqan «QazMunaıGaz» janarmaı quıý beketiniń operator-kassırleri kindik sheshe atandy. Jaınagúl Qurmanbekova men Toǵjan Orynbasarova ózderi jas ana bolǵanyna qaramastan, jolaýshy áıeldi sátti bosandyryp alǵan.
«Janarmaı beketine keshkisin taksı keldi. Onyń salonynda eki júkti áıel boldy. Júrgizýshi olardy Qulsary kentinen Atyraýdaǵy perzenthanaǵa alyp bara jatyr eken. Qalaǵa jetýge bes shaqyrym qalǵanda jolaýshylardyń biri Aıgerim Sarbasova ózin jaısyz sezine bastaǵan. Ol kólikti janarmaı quıý beketine toqtatýdy suraıdy. Kenet ony qatty tolǵaq qysqan. Ol qalaǵa deıin jetip úlgere almaıtynyn túsindi», - dep habarlady kompanııanyń baspasóz qyzmeti.
Janarmaı beketiniń qyzmetkerleri jedel járdem shaqyrǵan. Janarmaı quıý stansasy sheberiniń kabınetinde bosandyrý úshin oryn daıyndap, dárigerler kelgenge deıin Aıgerimge kómektesken. Jedel járdem dárigerleri janarmaı quıý stansasy qyzmetkerleriniń shıraq ári saýatty áreketterine tań-tamasha boldy. Solardyń arqasynda deni saý ul bala dúnıege keldi. Anasy men balasynyń jaǵdaıy jaqsy, kómekteskeni úshin kassırlerge alǵys aıtýda.
«Náresteniń esimin Bereket dep qoıdy. Kompanııa basshylyǵy balanyń dúnıege kelýine oraı, anasyna AI-92 benzıniniń 1000 lıtrine janarmaı kartasyn syılaý týraly sheshim qabyldady. Bosandyrý kezinde belsendi kómek kórsetkenderi úshin stansa qyzmetkerleri marapattaldy», - dep habarlady kompanııanyń baspasóz qyzmeti.
