Atyraý oblysynda júk kóliginiń janarmaı bagy janyp ketti
ATYRAÝ. QazAqparat – Atyraý oblysynda júk kóliginiń janarmaı baǵy janyp ketti, dep habarlaıdy QazAqparat.
Oblystyq tótenshe jaǵdaılar departamenti baspasóz qyzmetiniń málimetine súıensek, №2 Maqat aýdandyq órt sóndirý bólimine saǵat 14:43-te júk kóliginiń órtengeni týraly habar túsken.
«Órt sóndirýshiler «Dossor-Qulsary» tasjolynyń jıeginde «MAZ» markaly júk kóliginiń janyp jatqanyn anyqtady. Atyraý oblysynyń Qurmanǵazy aýdanyndaǵy «Aǵataı-Gaz» JShS-ne tıesili 2014 jyly shyǵarylǵan júk kóligi Mańǵystaý oblysynyń Beıneý aýdanyna baǵyt alǵan. Kóliktiń jartylaı tirkemesine bos qazan tıelgen. Jalynnyń saldarynan júk kóliginiń 8 dana dóńgelegi, 2 dana akkýmýlıatory men janarmaı bagy órtenip ketti», -dep habarlady departamenttiń baspasóz qyzmeti.
Júk kóligin sharpyǵan órt saǵat 15:11-de oqshaýlanyp, 3 mınýttan soń tolyq sóndirildi. Órtti sóndirýge 4 qyzmetker men 1 arnaýly tehnıka jumyldyryldy.
Qazir órttiń sebebi anyqtalyp jatyr.
Eske sala ketelik, buǵan deıin Atyraýda kópqabatty turǵyn úıden órt shyqqanyn habarlaǵan bolatynbyz.
