Atyraý oblysynda júk kóligi men jeńil kólik soqtyǵysty
ATYRAÝ. QazAqparat - Atyraý oblysynda ótkinshi jańbyrdan keıin kóktaıǵaqqa aınalǵan respýblıkalyq mańyzy bar tasjolda keptelis paıda bolǵan. Tasjoldardyń birinde júk kóligi men jeńil kólik soqtyǵysyp, ekeýi de aýdarylǵan. Oqıǵadan eki adam zardap shekti, dep habarlaıdy QazAqparat tilshisi.
Polıtsııa departamenti baspasóz qyzmetiniń aqparatynsha, eki kólik 29 qarashada soqtyǵysqan.
«Tótenshe jaǵdaı Atyraý-Oral tasjolynyń 17-shaqyrymynda 7.30-da bolǵan. Júk kóligi Atyraýǵa qaraı bet alsa, «Deo Djentra» júrgizýshisi qarsy baǵytta kele jatqan. Oqıǵa saldarynan júrgizýshiler túrli jaraqatpen aýrýhanaǵa jetkizildi. Qazirgi tańda birqatar saraptamalar taǵaıyndaldy», - dedi Polıtsııa departamentiniń baspasóz qyzmeti.
Polıtsııanyń deregi boıynsha, Dossor kentiniń aýmaǵynda Atyraý-Aqtóbe tasjolynda júk kólikteriniń saldarynan «keptelis» paıda bolǵan.
