Atyraý oblysynda jol ýchaskesi jyrylǵannan keıin tasqyn sý deńgeıi tómendegen
Óńirlik kommýnıkatsııalar qyzmetiniń aqparatyna súıensek, Qyzylqoǵa aýdanynyń ortalyǵy Mııaly aýylyna tasqyn sý basý qaýpi tóngen. Eldi meken turǵyndarynyń qaýipsizdigin qamtamasyz etý úshin Mııaly men Jangeldın aýyldarynyń aralyǵyndaǵy jol ýchaskesi jyrylǵan.
«Sońǵy kúnderi Aqtóbe oblysynyń aýmaǵynan bastalatyn Oıyl ózeninde tasqyn sýdyń kóp kelgeni baıqaldy. Sý kóptigi Qyzylqoǵa aýdanyndaǵy Mııaly aýylyna sý basý qaýpin týdyrýy múmkin. Sol sebepten, Mııaly aýyly mańyndaǵy tasqyn sý deńgeıin tómendetý maqsatynda 11 naýryzda saǵat 4:30-da Mııaly jáne Jangeldın eldi mekenderi arasyndaǵy joldyń bir bóligin arnaıy tehnıkanyń kómegimen jyrý týraly sheshim qabyldandy. Nátıjesinde aýyl mańyndaǵy sý deńgeıi tómendeı bastady. Tasqyn sýdyń negizgi bóligi Jarypshyqqan ózeniniń arnasymen aǵyp ketti. Osylaısha, eldi mekendi sý basýdyń aldyn alýǵa múmkindik týdy», - dep habarlady óńirlik kommýnıkatsııalar qyzmetinen.
Qazir aýdandaǵy barlyq qaýipti ýchaskede táýlik boıy kezekshilik uıymdastyrý qolǵa alynǵan. Al, Oıyl ózeniniń Qyzylqoǵa aýdany aýmaǵyndaǵy bóliginde sý deńgeıi tómendegen. Ózendegi sý deńgeıi 2,5 metr shamasyn kórsetip tur.
Aýdan ortalyǵy Mııaly aýylynan Jangeldın, Oıyl, Kózdiǵara, Tasshaǵyl, Jambyl, Qyzylqoǵa aýyldyq okrýgterine kólik qatynasy toqtaǵan.
Eske sala ketelik, budan buryn Atyraý oblysynda jol jyrylyp, kólik qatynasy toqtaǵanyn jazǵan bolatynbyz.