Atyraý oblysynda jol erejesi respýblıkalyq trassalarda jıi buzylady
Oblystyq Polıtsııa departamentiniń baspasóz qyzmetinen málim etkendeı, jolda júrý erejesin buzý respýblıkalyq mańyzy bar trassalarda jıi bolady.
«Bıylǵy jyl basynan beri munaıly óńirdegi oblystyq jáne respýblıkalyq mańyzy bar avtokólik joldarynda júrgizýshiler jasaǵan 20 myń 418 ákimshilik quqyq buzýshylyq deregi tirkeldi. Onyń ishinde Reseı Federatsııasynyń shekarasyna deıin sozylǵan jolda – 5 848, «Atyraý-Aqtóbe» tasjolynda – 5 177, «Atyraý-Oral» baǵytyndaǵy kúre jolda – 4 717, «Dossor-Qulsary-Beıneý» jolynda 4 736 ákimshilik quqyq buzýshylyq anyqtaldy. Jolda júrý qaǵıdalarynyń talaptaryn buzǵandar arasynan 3 898 júrgizýshi jyldamdyqty shekten tys asyrǵany úshin ustaldy», - dep habarlady departamenttiń baspasósz qyzmetinen.
Qazir patrýldik polıtsııa rotasynyń jeke quramy jol-kólik oqıǵalarynyń aldyn alý úshin «Qaýipsiz jol» jedel-profılaktıkalyq is-sharasyn ótkizip jatyr. Reıd 18 tamyzǵa deıin jalǵasady.
«Atyraý oblysynyń turǵyndary men kólik júrgizýshilerine jolda júrý qaǵıdalaryn qatań saqtaýdy eskertemiz. Bul úshin jol-kólik oqıǵasynyń aldyn alý úshin qarsy baǵyttaǵy jolaqqa shyqpaý, jaıaý júrginshilerge jol berý, jol qıylystarynan ótý erejesin buzbaý, jyldamdyqty shamadan tys asyrmaý qajet. Ásirese, aldynda qozǵalyp bara jatqan kólikti basyp ozý kezinde óte muqııat bolǵan jón», - dedi vedomstvonyń baspasóz qyzmetinen.
Eske salaıyq, buǵan deıin Atyraý oblysynda 7 aıda jol apatynan 49 adam kóz jumǵanyn jazǵan bolatynbyz.