Atyraý oblysynda jol apatynan júrgizýshi mert bolyp, jolaýshy aýrýhanaǵa tústi
Oblystyq polıtsııa departamenti baspasóz qyzmetiniń málimetine súıensek, jol-kólik oqıǵasy búgin, 17 shildede Maqat aýdanynyń aýmaǵynda bolǵan.
Osy aýdandaǵy Báıgetóbe aýyly baǵytyndaǵy tasjoldyń burylysynda jergilikti ýaqytpen saǵat 14:09 shamasynda «Lada Priora» kóligi jol jıegine aýdarylyp qalǵan.
Jol apatynyń saldarynan kólikti basqarǵan júrgizýshi oqıǵa ornynda mert boldy. Júrgizýshiniń jasy – 48-de. Al, kólikte otyrǵan 1974 jylǵy jolaýshy ár túrli dene jaraqatyn aldy. Zardap shekken jolaýshy Maqat aýdandyq ortalyq aýrýhanasyna jetkizildi.
«Qazir Maqat aýdandyq polıtsııa bóliminiń qyzmetkerleri atalǵan jol-kólik oqıǵasyna baılanysty tergeýdi bastady. Tergeý QR Qylmystyq kodeksiniń 345-babymen tergeý júrip jatyr», -dep habarlady departamenttiń baspasóz qyzmeti.
Buǵan deıin Atyraý oblysynda júk poıyzy men jeńil kólik soqtyǵysyp, bir adam mert bolǵanyn jazǵan edik.
Maqat kentinen 20 shaqyrym qashyqtyqtaǵy temir jol ótkelinen ótpek bolǵan «Lada Granta» jeńil avtokóligi júk poıyzyna soqtyǵysyp qalǵan.
Soqtyǵysýdyń saldarynan jeńil kóliktiń 1999 jylǵy júrgizýshisi jaraqat aldy. Al kólikte bolǵan 54 jastaǵy jolaýshy oqıǵa ornynda kóz jumǵan bolatyn.
Oblystyq tótenshe jaǵdaılar departamentiniń qyzmetkerleri mert bolǵan jolaýshynyń denesin «Holmatro» arnaıy quraly arqyly shyǵarýyna týra keldi.
Júk poıyzyna qurylys materıaldary tıelgen 66 júk vagony tirkelgen.