Atyraý oblysynda jol apatynan jaraqat alǵan polıtseı qaıtys boldy
ATYRAÝ. QazAqparat – Atyraý oblysynda jol apatynan jaraqat alǵan polıtseı qaıtys boldy, dep habarlaıdy QazAqparat.
Budan buryn Atyraý oblysynda eki kólik soqtyǵysyp, 7 adam aýrýhanaǵa túskenin jazǵan edik.
Oblystyq polıtsııa departamentiniń baspasóz qyzmetinen málim etkendeı, jol apaty 16 naýryzda saǵat 08:30 shamasynda «Atyraý-Inder» baǵytyndaǵy tas jolda bolǵan.
Atalǵan jolda kele jatqan «Toyota Camry» avtokóligi joldyń qarsy baǵytyna shyǵyp, «Skoda» qyzmettik kóligimen soqtyǵysqan. Jol-kólik apatynyń saldarynan 7 adam ár túrli dene jaraqatymen aýrýhanaǵa túsken. Aýrýhanaǵa túsken 7 adamnyń biri – polıtsııa aǵa leıtenanty Asylan Qajkenov.
Keshe, 18 naýryzda Mahambet aýdandyq polıtsııa bólimi polıtsııa qyzmetkeriniń qaıtys bolǵany týraly aqparat taratty.
«Asylan Qajkenov 1989 jyly dúnıege kelgen. 2014 jyly Batys Qazaqstan gýmanıtarlyq ınjenerlik ýnıversıtetiniń «Quqyqtaný» mamandyǵyn támamdady. Іshki ister organyndaǵy qyzmetin 2019 jylǵy qyrkúıekte bastady. Búgingi kúnge deıin Mahambet aýdandyq polıtsııa bólimi jergilikti polıtsııa qyzmeti bólimshesiniń patrýldik polıtsııa tobynyń qyzmet ınspektory laýazymyn atqaryp keldi. 2022 jyly 16 naýryzda «Atyraý-Inder» tas jolynda áriptesi, polıtsııa aǵa leıtenanty T.Sıranovpen birge jol qaýipsizdigin qamtamasyz etý úshin qyzmettik mindetterin adal atqardy. Oryn alǵan jol-kólik oqıǵasy saldarynan dúnıeden ótti», -dep habarlady polıtsııa bóliminen.
Sondaı-aq, áleýmettik jelide jol apatynyń vıdeosy jarııalandy.
