Atyraý oblysynda jol apatynan eki jolaýshy kóz jumdy
Jol-kólik oqıǵasy búgin, 2 qańtarda jergilikti ýaqytpen saǵat 11:50 shamasynda bolǵan.
«Atyraý oblysynyń aýmaǵymen ótetin «Dossor-Beıneý» tas jolynyń 147-shaqyrymy tusynda eki kólik soqtyǵysty. Kóliktiń biri – Priora, ekinshisi – Toyota Alphard. Jol-kólik oqıǵasynyń saldarynan «Priora» avtokóligindegi 2021 jáne 1985 jylǵy jolaýshylar oqıǵa ornynda qaza tapty», -dep habarlady departamenttiń baspasóz qyzmetinen.
Qazir polıtsııa qyzmetkerleri atalǵan jol-kólik oqıǵasyna baılanysty tıisti is-qujattar jınaqtap jatyr.
Jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń deregine qaraǵanda, byltyrǵy 11 aıda oblys aýmaǵynda 326 jol-kólik oqıǵasy tirkelgen.
Jol apatynan 391 adam jaraqat alǵan, 89 jolaýshy jantásilim etken.
Eske sala ketelik, budan buryn Atyraýda eki kólik soqtyǵysyp, bir adam mert bolǵanyn habarlaǵan edik.
Bul jol apaty Atyraý qalasynda tirkelgen. Chevrolet Cobalt kóliginiń júrgizýshisi joldyń qarsy baǵytyna shyǵyp ketken. Sonyń saldarynan Lexus kóligine soqtyǵysqan Shevrolet Cobalt-ta otyrǵan 50 jastaǵy jolaýshy oqıǵa ornynda qaza tapqan.
Sondaı-aq, Atyraý oblysynda 5 adam mert bolǵan jol apatyna kináli júrgizýshi sottaldy.
Jol-kólik oqıǵasy byltyrǵy 14 qańtarda saǵat 10:20 shamasynda Jylyoı aýdanynda bolǵan. «Honda Odyssey» markaly avtokóligin júrgizip kele jatqan júrgizýshi «Vaz-211540» markaly avtokóligimen soqtyǵysqan.
Jol-kólik oqıǵasynyń saldarynan «Vaz 211540» markaly avtokóligindegi júrgizýshi men 3 jolaýshy, «HondaOdyssey» markaly avtokóligindegi 1 jolaýshy qaza bolǵan.
Sot úkimimen júrgizýshi QR Qylmystyq kodeksi 345-babynyń 4-bóligimen kináli dep tanylyp, 5 jyl merzimge bas bostandyǵynan aıyryldy.
Foto: Atyraý oblysy polıtsııa departamenti
