Atyraý oblysynda jol apatynan ájesi men nemeresi qaza tapty
ATYRAÝ. QazAqparat - Atyraý oblysynda jol-kólik apatynan Reseı azamattary - ájesi men nemeresi qaza tapty, dep habarlaıdy «QazAqparat» HAA tilshisi.
«Jol-kólik apaty Atyraý-Astrahan trassasynda bolǵan. «Toyota Estima» markaly avtokóliktiń 30 jastaǵy júrgizýshisi rýlge ıe bola almaı, avtomobıl aýdarylǵan. Oqıǵa saldarynan salonda bolǵan 7 jolaýshynyń ekeýi sol jerde kóz jumǵan. Olar Astrahan oblysynyń turǵyndary - 77 jastaǵy ájeı men onyń 11 jasar nemeresi. Basqa tórt jolaýshy aýrýhanada tekserilýden ótkennen keıin úılerine qaıtaryldy. Qazirgi tańda 2009 jylǵy búldirshin dárigerlerdiń baqylaýynda», dep habarlady óńirlik ІІD baspasóz qyzmeti.
Eki adam qaza tapqan jol-kólik apaty faktisi boıynsha sotqa deıingi tergeý jumystary júrgizilýde.
